御用中風王︳潘志文憶當年演鄭少秋經典角色 臨出街收律師信：香帥變盜帥

現年72歲的潘志文（潘翁）早年在亞視是一線小生，演過《鱷魚淚》、《變色龍》及《大地恩情》等神劇，後期獲邀加盟無綫，由於先後在劇集《再創世紀》、《以和為貴》、《幕後玩家》及《EU超時任務》內飾演中風角色，被外間封為無綫的「御用中風王」。潘翁這次接受港台《一起走過》主持人楊紹鴻、文頌嫻訪問，分享他對「中風王」的睇法外，還談到入行曾挑戰過鄭少秋、劉丹及謝賢演過的經典角色，分別是楚留香、馮敬堯及段正淳，當中演楚留香還搞到收律師信，不單止主角香帥名字要改為盜帥，劇中楚留香的朋友亦齊齊改名。

同場加映：曾慧雲熱愛拍戲演閒角一樣開心 拍拖廿幾年不結婚視毛孩為兒女

{{hket:ul-video id="6676"}}{{/hket:ul-video}}

{{hket:inline-image name="09261004.jpg"}}{{/hket:inline-image}}

{{hket:inline-image name="09261005.jpg"}}{{/hket:inline-image}}

潘翁坦言演繹中風角色有一定難度，雖然已演過幾次，並不介意繼續再演，「呢類角色唔係易撈，瞓喺度都要講對白，仲有各種唔同嘅中風，有啲講嘢唔清楚、歪嘴、單單哋眼、流口水。都係咁啱編審、編劇寫開呢啲橋段，覺得觀眾會受落，我呢兩年演中風戲之後，係好多中風戲出現，有時啲戲鍾意講植物人角色。（介唔介意？）唔介意，有些角色死都要死。（會否要求唔再做？）唔會，如果有第5、6次中風角色，到時可以諗吓點樣中風。」

《變色龍》潘志文著亞視風褸敘舊 御用「中風王」奉獻演藝事業半世紀【下一頁】

入行逾55年的潘翁演過無數劇集，當中更有些經典角色曾被他人演繹過，而最高難度算是秋官鄭少秋的楚留香，當年紅遍大中華地區，而亞視於1981年開拍《俠盜風流》時，就找來潘翁演主角「楚留香」，但開播前卻收到無綫的律師信，他說：「《俠盜風流》係81年拍完《大地恩情》之後先拍，當時仲係叫楚留香，我都唔係好願，鄭少秋其實係我偶像，佢拍古裝做大俠真係無得頂，你叫我同佢打對台梗係唔想啦。（最初劇名是叫《盜帥留香》？）唔係，因為嗰時版權喺無綫，臨出街幾個鐘頭之前先畀律師信我哋，唔准我哋用《楚留香》做劇名，臨時變陣就將佢叫做《俠盜風流》，之前拍落咗楚香帥嗰啲即時要重新配音，香帥變做盜帥，劇中曾江、秦沛等等幾個朋友，統統都要改名。」

至於心中有否想過同秋官鬥過？潘翁謙虛表示：「我就冇諗過要鬥……上嚟做訪問前做過資料搜集，秋官造型係好瀟灑，好似話原著小說楚留香其實係個有鬍鬚嘅大叔，並唔係咁風流倜儻，而我嘅版本係比較沉實啲，有啲場口仲有黐鬚，一切都係公司話點就點。」

一起走過︳孟海爆李小龍只得元華一個替身 同羅芙洛近6年情分手原因…【下一頁】

後來潘翁在1996年《新上海灘》內飾演馮敬堯，1997年在《天龍八部》內飾演段正淳，兩個角色分別由劉丹及四哥謝賢飾演過，早已深入民心。潘翁說：「有睇過劉丹嘅版本，我就冇參考佢嗰種做法，感覺上佢有少少反派咁嘅做法，我就當自己係一個好人去演，同埋講我真係好錫個女，其實等如我飾演楚留香嗰陣，冇諗住鄭少秋嘅大俠形象去做。（先後跟秋官同四哥鬥瀟灑？）唔敢當、唔敢當，珠玉在前，我都係聽監製同導演，睇劇本要我點做就點做，冇話專登要搞啲乜嘢。」

（↓點擊圖片放大↓）

提到1995年選擇離開亞視，他指多年來一直有人邀請過檔無綫，但本身性格不喜歡跳來跳去，「當時喺亞視後期做咗一線尾藝人後，仲好好撈，又唔使拍咁多，又唔使咁辛苦，同期騎2、3套劇幾好入息。（不再一線頭有否唔開心？）又唔會，聽講秋官就會，佢鍾意做番一線……我都冇咩心理關口，明白應該係要咁樣，係一個循環。啱啱無綫搵我又人工高啲，嗰時問咗好多朋友同思考過，好多人叫我過去省吓招牌，喺亞視都咁多年嘞，又睇到無綫啲景、服裝同燈光真係sharp好多，於是拍完《九王奪位》同《洪熙官》就走。」

撰文：梁榮達

U Lifestyle App自家節目登錄《U TV》專區！

↓↓試玩、試食、試用影片任您睇↓↓

【立即體驗】