Twins兩年冇本地合體丨阿嬌減30磅堅瘦與阿Sa現身香港 提張致恒即落閘：都唔係我哋公司

兩年未有喺香港合體嘅Twins今日（29日）現身中環出席醫學美容品牌旗艦店開幕派對，以白色造型登場。鍾欣潼（阿嬌）以背心短裙示人大曬Fit爆身形，大騷佢嘅修身成果。阿嬌透露自己勁減30磅，佢分享自己現時感情狀態空白，但隨時迎接愛情來臨。

同場加映： Summer Girls丨張明偉陳思圻靠自己無悔離巢無綫 節目撼港姐：良性競爭先有火花

{{hket:ul-video id="6643"}}{{/hket:ul-video}}

喺內地爆晒job嘅阿嬌下月又會再次北上開工，近年喺內地「落地生根」置業，係想令自己安定啲：「喺上面養咗兩隻貓，返去要照顧佢哋。（今次踏入香港機場感覺係點？）喺度認親認戚，見到圈中嘅前輩戴晒口罩，所以要估佢係邊個，嗰種感覺既熟悉又陌生。」之前阿嬌自爆因為太靚而喺德國「卡關」，被問到驚唔驚再次因為過唔到關佢就話：「唔會囉，嗰次太騎呢，係驚畀佢阻住轉機，好彩最後趕得切。」

{{hket:inline-image name="559c9445b11db6bb449ffd4c3cb09e04.jpg"}}{{/hket:inline-image}}

阿嬌用咗半年時間減肥，阿Sa都大讚而家係阿嬌10年以來最巔峰狀態，阿嬌表示：「而家係健康嘅，唔需要刻意去keep。（咪要換過晒啲衫？）呢樣每年都會換。（最辛苦係邊個階段？）咪就係身邊個個喺度食嘢囉，當時拍緊節目啲拍檔好似吳謹言同王心凌咁，不停喺度叫嘢食，佢哋食量好大，自己要好忍得。」阿嬌就話冇因為修身成功多咗追求者，但就指已經做好心理準備接受新戀情。

好姊妹阿Sa對於介紹男朋友呢方面都愛莫能助，佢表示：「有都介紹咗啦，有啲有條件個樣又OK，冇拖拍都知有問題，介紹唔出手。（你之前北上，點同男友維繫？）又OK喎，佢都上嚟探咗我一次。」阿嬌則踢爆二人日日視像對話。阿Sa透露下個月亦會再北上，但之後唔會再停留咁耐，會中港兩邊走捱10日隔離：「之前21日都係咁隔，而家7+3濕濕碎啦。」

有指Twins下年將會補辦成軍20周年演唱會，問到佢哋會唔會邀請前同門Boy'z成員張致恒（Steven）：「佢都唔係我哋公司。」記者問到二人有冇睇Steven近日喺內地獻唱走音片段，阿嬌就斬釘截鐵表示：「呢啲唔談論。（阿Sa：唔講佢。）係朋友（指記者）就唔好問喇。」

至於二人有份演出的內地節目《星星的約定》突然停播，她們表示：「唔係腰斬，而係想重新剪輯，好快會復播。（有指有份出鏡胡彥斌出事？）我哋冇聽聞，唔清楚不過佢份人幾好。」