【聲明】港生活網站並無進行電話推廣活動

重演舞台劇玩謝小師弟 黃秋生︰要黐朱栢康搵食

發佈時間: 2022/10/05

黃秋生、陳淑儀及朱栢康(朱康)去年合演的舞台劇《ART呃》叫好叫座,三人將於本月底載譽重演《2呃22 ART》。難得與演藝學院大師兄秋生再度合作,近年穿梭影視圈的朱康甘做下靶跟前輩「學嘢」。然而,秋生卻笑稱要靠攏這位小師弟,「朱康又拍戲又拍劇,要黐住佢搵食,等佢關照我!」

舞台劇《ART呃》由一張白畫紙展開故事,三位不同階層的中佬對這件藝術品各有見解。有人認為是「Art」,又人卻覺得是「呃」,從而爆發爭拗,考驗三人的兄弟情。去年《ART呃》公演15場大獲好評,秋生在尾場謝幕時稱:「如果呢個係告別的話,我希望明年係一個復出。」結果一如所料,今年秋生再度回歸重演《2呃22 ART》,與陳淑儀及朱康本月尾重踏舞台,演出14場。

早前秋生、朱康及《2呃22 ART》導演張銘耀受訪,提到故事是否探討香港中佬的寫照,秋生認為不分地域。「地球上確實有好多小男人鍾意喺屋企洗衫,做啲師奶行為,好小心眼但又易被人傷害!」近年香港出現不少網上騙案,對於劇中一張抽象畫引伸的故事,秋生認為每個地方也有類似事情發生,「藝術唔係一般人可以清晰理解,有時藝術就好似經過包裝嘅迷信事物,裝神弄鬼一樣。」至於近年時興的NFT(非同質化代幣),秋生對此毫不了解,亦對這種新興投資貨幣大唱反調,「好多時老千會喺無犯法嘅情況下呃住先,純粹賣個信任。」

朱康回歸劇場拒忘本

從台灣回歸再踏舞台,秋生強調從來沒有移居寶島,更自言經常回港,今次為《2呃22 ART》付出不少心血,期望觀眾購票支持。提到拍檔朱康近年在電影及電視圈吃得開,秋生也忍不住抽水:「紅咪好,又戲又劇,好羨慕呀,我要黐住佢搵食,等佢關照我!」朱康即尷尬失笑,直言更要回歸劇場:「近年確實多咗拍影視作品,對我嚟講有新鮮感,不過自己係舞台劇演員出身,已經入晒血,所以一定要返劇場!」對於去年《ART呃》的成功,第二度與兩大前輩拍檔,朱康繼續保持謙厚,「一個係傳奇(秋生),一個係我演藝學院老師(陳淑儀),自己演出期間真係驚,不過亦算係我演藝生涯嘅里程碑!」

過去兩年多,全球受疫情拖累,香港不少舞台演出,亦受防疫政策影響而被迫取消或延期。對於如何鼓勵新一代舞台劇演員捱下去,秋生坦言︰「大家要繼續向前看,做得幾多得幾多,雖然依家環境唔同咗,但觀眾都需要演唱會、舞台劇,現場演出唔會就咁消失,網上騷係無辦法取代!」《2呃22 ART》導演張銘耀亦深表認同,「我即使晚晚都睇YouTube,都取代唔到現場演出,舞台劇係一班人共同發生同經歷,任何時候都需要呢種演出。」

讚《IT狗》岑珈其出色

另一方面,早年秋生憑無綫劇集《梟雄》在《萬千星輝頒獎典禮》贏得視帝,及後亦憑ViuTV劇集《理想國-聲音監獄》於《第25屆亞洲電視大獎》拿下亞洲視帝。對於近年本地電視圈競爭劇烈,ViuTV多齣破格劇集獲觀眾受落,秋生希望電視業持續百花齊放。「其實任何電視台都可以有好製作,不嬲都應該有唔同類型劇集。」秋生原來亦有欣賞早前的熱播劇《IT狗》,「之前我有睇《IT狗》,劇入面好多演員我都好欣賞,好似岑珈其演得好好;凌文龍就差少少,好似被其他人爬頭,因為我識佢,知道佢可以做得更好。」

黃秋生

化粧︰LUMAKEUP.ME

髮型︰Taky Chung@AdmiX Hair Styling

朱栢康

化粧︰ Maggie Lee

髮型︰Ray Mork@ AdmiX Hair Styling

張銘耀

髮型︰AdmiX Hair Styling

場地︰GPM & Co Limited

撰文︰Steven

攝影︰林良明

美術︰梁政敏

重演舞台劇玩謝小師弟 黃秋生︰要黐朱栢康搵食

秋生相信電視台拍攝更多不同題材劇集,整個行業才會持續進步。

重演舞台劇玩謝小師弟 黃秋生︰要黐朱栢康搵食

《ART呃》去年公演叫好叫座,三位好戲之人為觀眾帶來無盡笑聲。

重演舞台劇玩謝小師弟 黃秋生︰要黐朱栢康搵食

秋生早前在朱康穿針引綫下,與來港工作的台灣男星吳慷仁(左)飯聚。(FB圖片)

重演舞台劇玩謝小師弟 黃秋生︰要黐朱栢康搵食

張銘耀期望《ART呃》能夠長演長有,亦相信網上騷無法取代舞台劇。

重演舞台劇玩謝小師弟 黃秋生︰要黐朱栢康搵食

岑珈其(右)憑《IT狗》提名釜山國際電影節「亞洲內容大獎」最佳男配角。