梁思浩再提《國產凌凌漆》被「糟質」 羅泳嫻揭周星馳另有目標被錯怪？

梁思浩曾爆拍攝電影《國產凌凌漆》嘅經歷，指當時邀請佢拍攝嘅周星馳（星爺）對佢呼喝，更被對方整蠱。梁思浩記喺心中多年，不過早前佢同羅泳嫻以及李思蓓喺網台節目《大家真瘋Show》討論事件時，竟然得出一個完全唔同嘅結論，成件事即刻嚟一個大反轉呀！

同場加映：下流上車族｜關曜儁疫市擲六位數第三度開健身室 三十而立背負養家責任兼顧演員夢

{{hket:ul-video id="6868"}}{{/hket:ul-video}}

梁思浩先回想當年事件，覺得自己有處理不當嘅地方，指自己喺眾人面前唔應該再叫當時係導演嘅周星馳做「星仔」。節目另一主持羅泳嫻就用佢專長嘅塔羅牌「睇」到原因當時星爺針對嘅並唔係梁思浩：「思浩喺佢（星爺）眼中冇咩差別，佢當日想整蠱、想針對嘅對象係你隔籬嗰位。佢當時見到『尊爺』（鄧兆尊）、呢個公子嚟拍戲，屋企大把錢冇咩捱過，畀你受吓先！因為佢鍾意人由低做起，佢覺得佢靠父蔭……」

{{hket:inline-image name="bbdcfa5a6b47ca782e41ecab9562a0d0.jpg"}}{{/hket:inline-image}}

梁思浩「恍然大悟」回應：「哦……原來事情真相係咁……呢個版本我認同，我諗我嬲錯周星馳，假設佢唔喜歡梁思浩，拍完《國產凌凌漆》佢唔會再嚟搵我。」梁思浩指佢冇再搵星爺，但星爺曾搵佢出演《食神》入面祝文君演「城市睇真啲」嘅女記者角色，不過當時嬲咗星爺嘅梁思浩果斷拒絕；星爺之後再透過製片人，表示出演嘅價錢同時間任佢開，但佢仍然企硬唔拍。梁思浩多次表示諗深一層自己的確錯怪星爺，可能會主動搵對方求證。

梁思浩與周星馳於1988年喺無綫認識，二人合演電視劇《大都會》，周星馳飾演梁思浩哥哥而成為朋友。梁思浩指當時周星馳嘅第一架車就係同佢買，雙方感情算幾好。不過1994年周星馳拍電影《國產凌凌漆》，搵身在天津嘅梁思浩回港拍戲，收1萬一組。梁思浩表示去到現場見到周星馳就稱呼對方做「星仔」，點知周星馳冇理佢，劇組人員提醒佢要叫「導演」，於是佢先改口。

梁思浩回想周星馳大聲指導佢拍呢場戲：「喊呀！你識唔識喊呀演員！」梁思浩續說：「我當時好天真答『識，我喺行頭裡出名好喊得吓』。周星馳就回應『咁勁呀！好呀！而家講你打靶，拍吖。死過老竇未呀？死老竇咁喊畀我睇』。我再問對白呢？周星馳嬲嬲地回答『唔使對白，1、2、3、4咁數到100，拍吖』。」

梁思浩喊到聲嘶力竭，拍完後問周星馳：「導演，我得唔得呀？」周星馳語氣躁爆回答：「唔得呀！我要你死老竇，死兩次嗰隻呀！」結果梁思浩由朝早10點喊到凌晨5點，喊足17次。豈料拍完後李力持同梁思浩講除咗第一take外，之後全部無開機拍，佢先知道自己被玩，而李力持多年後有喺電台公開向梁思浩道歉。梁思浩當時激動含淚表示自己就算將來做乞兒，都唔會再拍周星馳嘅戲。

而當年周星馳發言人魏達深表示，梁思浩只係拍了一場戲，亦唔知道對方有呢個感受；不過已係咁多年前嘅事，唔使有咩回應。