林盛斌演徐富貴獲肯定眼濕濕 教囡囡和平面對Hater爆真實身家

無綫台慶劇《美麗戰場》完美落幕，除咗一眾女角受注視，劇中飾演徐富貴一角嘅Bob（林盛斌）亦受到網民追捧。近日，Bob接受網上平台盒子BOX channel節目《月傾會》訪問，主持人林柏希同Bob相識30年，兩人係中學同學，傾都傾得放啲。林柏希話Bob由細到大都係調解員性格，Bob話天秤座係鍾意公平、和平同和諧，更曾為林柏希和另一友人調解。

最難撮合方力申

Bob喺圈中人緣極佳，有「金牌媒人」之稱，佢大爆方力申係最難撮合嘅藝人：「無論係我電話同佢講，定真人同佢講，我話，喂，睇下吖，呢個真係幾好，同埋佢對你有好感呀，佢話唔好啦！ 大佬，你連交友app都有玩，點解你唔要個朋友去介紹一個幾好嘅？佢又成日話唔好......扭擰都唔緊要，咁你對自己有要求，想要搵個更加好， 但連呢個開放嘅機會去試下，都話好似唔係好好！」

同場加映： 下流上車族｜鮑起靜樂做銀髮族跟發哥學慢跑 拒跟女兒移民英國與老伴留港度餘生

{{hket:ul-video id="6929"}}{{/hket:ul-video}}

想搵女神倪晨曦拍純愛劇

Bob今次又同葉念琛合作拍《美麗戰場》大受好評，佢表示：「另一個要多謝，就係我嘅拍檔阿Moon（劉佩玥），一個好好嘅女孩子，一個好專業嘅演員，對件事好認真，大家都真係好投入去做，同佢一個情深嘅擁抱，都係萬語千言盡在嗰一兩幕之中。做完之後啲工作人員都走嚟同我講㗎，『嘩，好嘢喎，估唔到你有啲暖男情深感覺喎！』」

被網民封為「最強CP」，Bob笑說：「平時多數都係插我多㗎嘛！激進少少討論區嗰一兩個呢，佢讚我喎！估唔到嗰個肥X都可以，咦，都感動到喎，佢喺度回顧返自己嘅故事，喂，我眼濕濕喎！」頒獎禮最佳男配角有望？「我希望係嘅，咁起碼知道原來有機會最後五強喎 ，其中一個係自己嘅話呢，經已係勝出了！」

Bob原來最想演一套純愛劇，「即係《Love Generation》（戀愛世紀），木村拓哉加松隆子嗰啲喎，我哋以前讀書睇嗰啲，嘩，點解咁好睇㗎！我做木村拓哉唔知有冇人想睇？呢啲都係自己一個嘅諗法！」女主角誰屬？「嗱，有一個女神，我曾經都同佢合作過，就係IG女神倪晨曦。佢真係散發嗰種，大家會想望佢，就係嗰種仙氣啦！」

{{hket:inline-image name="313201289_122778903928690_4682644523661425658_n.jpg"}}{{/hket:inline-image}}

教囡囡面對hater

Bob出道至今訓練到百毒不侵，連老婆仔女都成為公眾視線，佢教囡囡用平和心態面對hater：「我當然話番畀佢哋聽，唔好意思，因為可能爸爸做呢個工作嘅關係，令到啲人會注視我，我哋一齊去面對呢一啲嘅留言吖！大家正能量啲，我話霏霏，你見到呢啲嘅（留言），你畀個like佢，因為能夠搵到支持你嘅人，係唔容易㗎！到見到有啲留言話，『呢個女仔扮咩，個老竇麻煩，個女都係咁㗎啦，一擔擔㗎啦，食屎啦！』照樣留言畀佢，話番畀佢聽你嘅感受，我哋係用一個好和平嘅心態！」

去到《大膽答 冇膽食》環節，今次懲罰食物係Bob最驚嘅納豆，「逼供」佢身家有幾多，佢都大方回應：「我覺得如果當我變賣晒所有嘅資產，咁我諗可能我唔做嘢一段長嘅時間，而維持到而家嘅生活，都應該去到細仔中學畢業咁！」個個話你身家過億？「7位8位數字，大概8位數字！」

{{hket:inline-image name="5.jpeg"}}{{/hket:inline-image}}

靚仔男歌星大支嘢

Bob又講到入行以來佢遇過最難堪嘅一次遭遇：「有一年喺我哋電台（新城）頒獎禮嘅後台，當時台長係銳哥（朱明鋭）叫我揸住個錄音機就錄嗰啲『新城電台 新年快樂』，去到某一個歌手嘅時候，先同唱片公司嗰個人講，唔好意思，我想搵阿邊個錄呢段嘢，佢睇完OK，叫我試吓問吓佢啦，我咪走埋去囉，唔好意思，咁我好有禮貌好客氣，可唔可以錄一錄呢段呀，一睇，跟住有小小嘅嘖（一聲），掉走咗喎！我睇到張紙飄落地，佢又行開咗，我唔知佢有心定無意定唔小心跌咗，跟住之後個唱片公司（員工）話sorry sorry，我諗都知佢脾性，我心諗佢都幾大支嘢喎！」男歌星？「當時得令啦，又靚仔又盛！」

Bob平日同老婆糖黐豆，原來都曾經激奀老婆：「嗰陣啱啱結婚冇耐，嗰時同幾個朋友夾份開酒吧要應酬，『喂，Bob，而家落嚟呀，你過唔過嚟』，咁嗰陣又開緊咪，開完咪之後又要去喇，有時真係飲到天光，朝頭早先有機會返到屋企， 仲要斷晒片！我試過去咗個衣櫃度，以為係廁所屙咗篤尿，屋企個門口又試過，入到自己屋喺個睡房門又以為係廁所。有好幾個月，嗰段時間就係我老婆話得我最緊要嘅時侯！」

最後問到Bob最睇好邊個「最佳男配角」，佢話：「第一我又幾鍾意喺《美麗戰場》入面，李成昌、昌哥，即係阿威爺啦；另外我鍾意之前《痞子殿下》阿康張穎康，仲有阿朱仔朱敏瀚都係幾出㗎；《黯夜守護者》阿big boss謝東閔；咁如果你畀我再加埋《下流上車族》，我想加埋鄧智堅，智堅我覺得都好deserve個嘉許，同埋認同嘅機會！」