周慧敏落手落腳為媽媽全屋翻新 享受做「V記油漆」：一人油大畫

今日係「玉女掌門人」周慧敏（Vivian）55歲生日，佢喺自己社交平台發布咗幾張為媽媽屋企翻新嘅相，孝順嘅佢視之為送畀已過身媽媽嘅一份心意，同時佢亦都好享受落手落腳「裝修」。唔少人都大讚佢又靚又有才藝，竟然連髹油都識！Vivian自己都相當享受，當係送畀自己嘅生日禮物。

同場加映： 忽然心動丨湯洛雯首次拍電影七日起貨嗌爽 栢天男演出租男友堅食蟲？

{{hket:ul-video id="6937"}}{{/hket:ul-video}}

Vivian表示有一棟棟擺到「危危乎」嘅鞋盒喺亡母屋企困擾咗佢一段時間，所以決心要整理好。斷捨離之後佢去到五金舖同店員傾髹油嘅事，店員相信Vivian應付得來，Vivian就買工具同顏料「開工」，留言：「朋友說為甚麼不請專業人士來做，但我真的很有興趣親自做，因為我看待這個是我一人油大畫的遊戲。記得小時候搬到西營盤，見到媽媽髹油，很羨慕她可以這樣做，我只幫手做小助手和揼木凳仔，因為我才是個小學生。」

{{hket:inline-image name="314734128_1569086073551481_4735484368575639046_n.jpg"}}{{/hket:inline-image}}

Vivian話佢本來只想為某啲家具轉色上油漆，不過完成後想髹嘅地方變多，最後除咗天花板之外，所有可以上油漆的地方都上了：「大部分上櫃子、房門、石屎牆的漆油都只是加水，又有去味科技，口罩也不用戴上。惟獨上木牆和門鎖的漆油要加入天拿水，所以口罩和防護罩都要戴上，要好好保護自己。最開心的，就是把原來破舊了的餐桌和椅子也修好。因為餐桌是黑色，用黑色marker筆上色就可以了。至於修補有圖案的椅子，真的是一堂勞作課。因為有pattern，很難找到同樣的布料。我的方法是先縫上黑布打底，然後用筆塗上銀色和白色的點點，再用一排排橫縫的黑線繡出近似的pattern，效果不錯。」

Vivian笑稱自己係「V記油漆」，能夠將有歷史同感情的物件修補好保存，佢覺得好有意思：「整個油漆工程對我非常治癒，實在太令我喜樂和滿足了，心情好得很。這張大畫，除了送給天上的媽媽外，也是我送給自己最棒的生日禮物。」最後一張圖Vivian都有「派福利」，附上一張佢今日嘅正面相，相中嘅佢依舊明艷照人，臉上幾乎見唔到歲月痕跡。

唔少網民都大讚佢又靚又叻，不枉佢咁多年嚟都係大家心目中嘅女神，留言：「生日快樂！你的生活真是既充實又多采多姿，還展現了你的多才多藝。」、「呢啲都識做，唔簡單」、「細個覺得你好靚，大個都係覺得流於表面的美女，今天見你自己做油漆的滿足感，覺得你不是流於表面的人，原來真係有人美心善的人」、「辛苦了一日油漆，依然咁靚，真是羡煞旁人。」

圖片來源：Instagram