《法證V》演冷面天才 丁子朗獲封「新一代劇霸」

丁子朗（丁丁）前晚在《法證先鋒V》登場，飾演醫學院學生的他，自發調查護老院看護涉推長者出天台吹風事件，協助重案組破案。今年丁丁先後參演《青春不要臉》、《金宵大廈2》、《美麗戰場》、《下流上車族》及《法證V》，獲網民封為「新一代劇霸」。演慣陽光男孩的丁丁，今次卻扮演自閉陰沉天才男，對製造標本有濃厚興趣，因此拍攝時需接觸真實松鼠標本。

在花絮片中，丁丁看到松鼠標本時表現驚青兼瘋狂喊驚，但正式埋位後，他即專業地對着松鼠標本認真演戲。他事後說︰「我本身真係好驚，但又要做到好鍾意咁，真係好大挑戰！因為真係縫落個標本度，所以要克服恐懼。我好鍾意呢個角色，好冷靜同寡言，同埋有戀屍癖，同我之前嘅角色好唔似，可以話係入行以嚟最喜歡嘅角色之一。」