金剛「返」廣州發展望結婚生仔 「不文」談及獨愛豐滿女生原因

近年藝人金剛好少喺香港出現，返咗台灣發展嘅佢近日又去到內地發展，接受網紅訪問，傾吓嚟緊嘅事業大計。

同場加映：炎明熹唱歌老師│ 高晨維曾因屋企破產離開香港樂壇 以過來人身分陪伴學生經歷起跌

{{hket:ul-video id="7022"}}{{/hket:ul-video}}

短片一開始，節目主持人就話金剛返咗嚟廣州，金剛就全程以廣東話接受訪問。一嚟就講到金剛之前嘅女友，主持人指金剛嘅女友身材都非常驕人，問佢對呢類型嘅女性係咪情有獨鍾，之後金剛就「開黃腔」：「少少啫，你知我隻手好大（舉起右手）……你睇我隻手幾大（主持人：「係喎唔怪得我嗰啲同你有分別」）唔好講出嚟，阿嫂喺度……」

{{hket:inline-image name="300.JPG"}}{{/hket:inline-image}}

金剛講到做藝人多年經歷：「曾經搵過好多錢，都試過搵唔到錢。覺得自己心態好緊要，因為有啲人會放唔低，覺得自己曾經高過，點解要我做咁低嘅嘢呢？呢兩年我叫做有啲『沉』，諗起都係一件好事嚟。當你喺最高嘅時候，所有人都會話你好，乜都好，就算你放個屁係臭啲人都話係香……好彩我經歷過，衰咗，冇人理，對我嚟講係一件開心嘅事嚟。」

至於未來嘅事業發展，金剛就話順其自然：「始終我哋做呢行唔係話想點就點，總之有嘢畀你做，你就做好自己應該要有嘅位置，如果做多咗呢……梗係希望攞多啲錢啦！」

金剛再次講到自己嘅愛情同埋家庭觀：「其實我係想結婚生仔，自己最早計劃係25歲結婚……」之後一再推遲到28歲，35歲，兜兜轉轉到而家41歲又變番一支公，佢對擇偶仍然有一份「堅持」：「你唔可以掂自己嘅粉絲……但其他人嘅粉絲，可以！」

佢好鍾意廣州：「我一返到嚟就覺得好有親切感，大家見到我好似見到朋友咁，我覺得好warm！同埋而家廣州同其他城市都發展得好好，我覺得住喺度真係好舒服。屋企人就喺台北，諗住返去同佢哋過年，再飛嚟（廣州），長時間留喺度。」嚟緊當地除咗有佢嘅飲食節目播出，12月喺順德仲有一場棟篤笑，非常多演出機會！ 

今年5月時佢同小嫻分手，結束維持1年多戀情，直播時金剛明顯情緒激動，惟小嫻則相對冷靜。當時女方閨密指金剛性格懶散，小嫻唔想再以媽媽嘅態度對待男朋友，望他早日事業有成，經濟獨立。小嫻努力搵錢，惟金剛唔上進，令對方感到心死，最終導致分手。唔知係咪就係咁令金剛發奮向上？決心留廣州搵真銀。

撰文：黃蘊姿