MIRROR成員盧瀚霆（Anson Lo）和柳應廷（Jer）在全新ViuTV喜劇《百萬同居計劃》合作，難得以為「同居」主題的喜劇，加上前輩黃德斌的加持和幫助，撞出不少即興的火花。兩人原本以為輕鬆應付，沒想到兩人為著「天敵」曱甴的劇情而吃盡苦頭，令他們大感難忘。
ViuTV全新劇集《百萬同居計劃》明晚啟播，故事講述一群互不相識的人，為百萬獎金而過著半年的同居生活，但他們萬萬想不到，這班「兼職屋企人」隨著日夕相對的相處，竟也真的漸漸生出感情來。當他們各自遇上不同的難關時，這班屋企人竟是世上唯一願意伸出援手的最強後盾，也許是因為齊上齊落才有獎金，又或是他們真的漸漸成為了「親人」。
百萬同居計劃丨盧瀚霆台上爆喊被指賣慘搶鋒頭 向觀眾道歉：當時真係hold唔住【下一頁】
劇集以去年《大叔的愛》大部份演員再合作，而Jer則是新加入的，他形容角色有少少似卡通人物，事關要做很多浮誇表情，而且好有禮貌又真誠友善！而阿Lo的角色燈仔被形容高大威猛，由於要做體力勞動性的如搬貨、維修等工作，少不免要騷肌，為此他公餘時間都不敢怠慢，日舉夜舉，務求令上身厚實一點。阿Lo笑言：「燈仔同本身性格剛好相反，佢比較隨性，既來之則安之，乜都無所謂，夠錢過到今日就夠，聽日嘅事聽日先算啦！但我就係有計劃嘅人，100%過份顧慮好多嘢。」
阿Lo過往在節目中被踢爆原來極怕鮮魚魚頭，加上本身有潔癖，不過今次拍攝要挑戰他的心理關口，「要搬貨已經好污糟，仲要塞隻手入汽油缸、又要沖涼時徒手執一堆頭髮，平時我會用好多紙巾包住執頭髮，今次要一手執上嚟，要突破自己衛生習慣關口。」說時旁人都感受到他那份厭惡，阿Lo笑言最初一、兩take都會立刻消毒後再埋位拍攝，但NG多次後，索性拍完才徹底消毒。
盧瀚霆母校25周年校慶曬小學生相 「教父」退休幫手新歌應援【下一頁】
不過數最難頂的一幕，他們異口同聲稱是活生生的曱甴在他們身邊不受控地爬行， 那場戲講述阿Lo和徐㴓喬（Asha）行山澗，原先以為是浪漫場口，沒料到腳下竟出現多隻水曱甴，「我都驚曱甴，但冇魚頭咁驚，嗰場戲要咬實牙關拍攝，由於要遷就多角度拍攝，呢場戲拍咗成個鐘，(愛上曱甴做朋友？）嘩！我冇同佢哋做朋友，都冇愛上佢哋，但演員就要專業嘛！」Jer透露同樣因為一隻曱甴令他大出洋相，他笑言：「嗰場戲講我喺屋企見到隻曱甴，左閃右避之下跣低，其實係真跣咗落地，仲撞瘀膝頭。」
雖然兩人付出心靈創傷的代價，但都說拍得開心的，畢竟導演給他們很大自由發揮，無論做表情抑或講對白，都讓他們創意無限，爆肚更無任歡迎。阿Lo說難得前輩肯玩和撞火花，要數爆肚最多的人是黃德斌，阿Lo說：「好多對白、反應都係臨時爆肚改用字，有場教堂戲，德斌突然暈低整個人跌落地，排練時唔係咁，但大家見德斌『加戲』又配合去玩，製造出好多意想不到嘅搞笑效果。」
此外，MIRROR多位成員近年相繼創立個人服裝品牌，早前Jer才成立服裝品牌，日前又有消息阿Lo亦將加入老闆行列，將於明年一月推出一系列服裝，他說：「本身鍾意fashion ，其實拍攝《男排女將》嘅時候都有構思過，但礙於未ready，如果等工作量少先搞都唔知要等到幾時，倒不如就做啦！品牌嘅衫都係親自設計，亦代表自己風格，總之都係我平時鍾意歡嘅款式，都期待大家著上身嘅感覺。」今次阿Lo投資了七位數經營這門生意，他認為只要實現到自己的興趣，花這筆錢是值得的，最重要是做到令自己引以為傲的事。
化妝：Rainbow Chung @Annie G. Chan Makeup Centre, Cori Wong @Annie G. Chan Makeup Centre
髮型：Denny Ku @CHIC Private I salon, Man Chan @CHIC Private I salon
服裝：Kenzo, Lane Crawford, Harrison Wong, All Saints, Giuseppe Zanotti
造型：PIPA Creative
撰文：黃寶蓮
攝影：何家賢
編輯：楊安莉
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】