引薦袁澧林求回報 張繼聰︰轉帳幾十萬畀我

前晚張繼聰、袁澧林（Angela）出席主演的電影《窄路微塵》首映禮，近來不少港產片大收，阿聰有信心票房達5,000萬。Angela則感激獲阿聰引薦給電影公司，她才有機會成為女主角，阿聰搞笑道︰「我畀個銀行戶口號碼你，轉帳幾十萬畀我！」

前晚，袁澧林以tube top上陣出席《窄路微塵》首映禮，男主角張繼聰太太謝安琪、陳詠燊、袁劍偉及黃修平等也有到場支持。Angela與阿聰憑該片入圍台灣金馬獎爭影后及影帝，雖然雙雙名落孫山，但演技受到肯定。阿聰期望電影票房達5,000萬，「呢部戲講基層，但唔係慘情，係講三個人喺疫情中搵到力量行落去；希望大家喺22號上畫睇完，明年元旦又再睇。」他又笑指答謝觀眾的重任交給拍檔。

狂吸金過肥年

Angela透露今次擔正全靠阿聰幫手︰「當時佢向電影公司推薦我，之後我就收到電話去面試，最後成功，我要多謝佢。」身旁的阿聰即笑言︰「我畀個銀行戶口號碼你，轉帳幾十萬畀我！」阿聰指Angela的角色難駕馭，大讚她演得好︰「佢演曾經行歪路嘅單親媽媽，唔容易演，佢做得好好，證明呢行無懷才不遇。」他透露稍後會瘋狂謝票，但同期會拍新戲及廣告，不停吸金過肥年︰「我都好感恩、惜福，我一定會四出謝票，都會包場請親友去睇戲。」此外，問到Angela可會邀請緋聞男友呂爵安（Edan）捧場？她表示︰「無叫佢睇，不過當然愈多人睇愈好，都希望佢入場支持下。（傳短訊叫佢買飛？）佢鍾意睇就睇啦！」

攝影︰林良明

美術︰梁政敏

採訪︰Steven