新都城中心逛歐陸風市集 與5米高聖誕老人打卡

今個聖誕節實在太多好去處，黛安收到風，MCP CENTRAL (新都城中心2期)特別聯乘女生至愛嘅Barbie，打造「Barbie冬日夢幻之旅」主題活動；另外，即日起至明年1月2日，仲係MCP DISCOVERY (新都城中心3期)加推「閃亮聖誕市集」，5米高嘅充氣聖誕老人亦會喺市集同大家會面！

今次市集充滿歐陸風，有50間人氣特色小店進駐，由聖誕主題禮品、手工飾品、優質食品應有盡有。黛安就心儀Handworkshop木製餐具、以硬幣製作飾品嘅Dee Gogh，仲有本地手作香味產品等。如果準備開聖誕Party，一定要買Victor & Hugo Chocolatier嘅進口優質葡萄酒、朱古力及奶酪食品，而本地人氣朱古力品牌Rayca’s Chocolate及高質素乾果小食店Greatnuts嘅產品亦不容錯過。另外，市集入口仲有5米高嘅充氣聖誕老人，開心購物之餘，可順便打卡，一起開心過聖誕啦。