大學選修社會工作科的人，通常具備3大特性 — 熱血、堅持、耐性。聖雅各福群會總幹事李玉芝（Josephine），先後於中大及港大取得社工學士和碩士，她擁有以上性格特質嗎？「熱血同堅持我有，耐性唔係。我見到啲服務有需要時會好心急，立即Push前線同事令事情發生。」她說話的節奏也很急。
要形容Josephine很Easy，一個爽字。她爽朗、爽手，零扭捏，坦白加直接，暗藏點點感性。中三那年，她站在文科與理科的交叉點，將來只想做醫生或社工，並無第三志願。老師聽後面有難色，認為她選擇理科的話，會考就算考得好，高級程度試成績也敵不過男生：「以前女仔揀理科型好多，但老師咁講就算啦，咁我揀文科做社工啦！」讀完中大，她再考港大社工系碩士，前任勞工及福利局局長羅致光當時仍任教於港大。
「面試時Dr. Law問我點解要嚟HKU讀書，我話我嘅心願係要嚟呢度走一轉，你收我啦！」她很堅持，亦很熱血，「當年我哋十個畢業生，十個都會搵到工，就算入唔到社福機構，社署都有少少包底（空缺）。有師姐話聖雅各請緊人做輔導，做輔導通常會兼任學校社工，咁即是幫中學生啦，係我鍾意嘅範疇。我記得第二、三日後就遞信，第四、五日就見工，第六第七日就返工咯！」當時是1989年。
從學校社工到照顧長者
Josephine由家庭輔導員做起。要梳理問題家庭的棘手事，先要管控好自身情緒。她不慌不怯，皆因早已見過了世面：「大學實習時，我喺社會福利署做過，處理過嘅Case都非常『啃』，包括比打打鬧鬧更恐怖、涉及精神折磨、婚姻狀況好惡劣嘅夫婦。入咗聖雅各一年之後，我一半時間做輔導，一半時間做學校社工。」
學校社工和長者照顧是兩個極端，年青人前路很長，可能性無限，但長者們剛好相反。1997年1月1日，Josephine榮升長者服務部主管，便體會到當中的不同，「做學校社工時面對活潑嘅學生，佢哋感受到你錫佢，但好似好難去改變佢哋一啲想法。至於長者，佢哋係好開心嘅服務對象，做乜佢哋都開心感恩。同長者去旅行，佢哋會有講有笑；我跟啲同事去送飯時，見到佢哋等咗成日，終於有家務助理員敲門放低個飯，問候佢哋食咗藥未呀？有冇準時去睇醫生咁，你好感受到佢哋嘅開心。」
她亦見證過不少長者身體狀況走下坡，「我哋嘅服務係持續照顧，健健康康嘅老友記本來嚟開聖雅各1樓，但身體突然轉差例如中咗風嘅，就要上我哋2樓日間護理中心，甚至有啲唔見一排原來過咗身，同事都會難過，好唔開心。」
- {{hket:inline-image name="1.jpeg"}}{{/hket:inline-image}}
- {{hket:inline-image name="IMG_1313_20221209204646.JPG"}}{{/hket:inline-image}}
- {{hket:inline-image name="IMG_1315_20221209204806.JPG"}}{{/hket:inline-image}}
- {{hket:inline-image name="IMG_1301_20221209202056.JPG"}}{{/hket:inline-image}}
- {{hket:inline-image name="image2.jpeg"}}{{/hket:inline-image}}
- {{hket:inline-image name="IMG_1309_20221209204441.JPG"}}{{/hket:inline-image}}
前線味濃烈，有強烈「親力親為感」的她，2018年1月成為聖雅各總幹事後，作為千八位職員、千名義工的總司令，依然心思思想親自落場打，「我哋院舍有9間，當中兩間係長者院舍，疫情第五波嘅時候嚟得好急，我哋有啲老人家染疫，人手不足。我好想感受院舍同事嘅擔心，所以就申請假期，唔用總幹事嘅身分入去做一日嘢。嗰時只有院長知道我入去做義工，加上保護衣、口罩面罩遮蔽下，冇人知道係我。我以為入去做清潔啦，點知一嚟就被叫去餵老人家食橙汁凝固粉，老人家好乖成碗食晒，但去到晏晝餵飯就辛苦囉，另一位老人家食到一半唔肯食，同事話：『唔得呀食得太少，一定要繼續餵！』早上11點幾及下午3點幾我兩度想放棄，著住保護衣真係好辛苦，Full Gear又冇得去廁所，但我同自己講：『我要堅持！』最後捱到6點幾收工。」
以上只是院舍前線同事們的其中一天。
待同事如家人
經此實地體驗，她更精準地對院舍同事作出三大支援，一︰同事必須做好保護，快測要早晚各一次，晚一次為家人，早一次為老人家。二︰高速找到一間酒店，準備好40多間客房，讓擔心家人的前線同事暫住。三︰如果同事確診，做法是進行逆向隔離，同事回家去，家人住酒店。
疫情最嚴峻時期，在六分一同事或同事家人中招之下，Josephine及其團隊完美示範了甚麼是Team Work。她說：「我嘅Senior同事們好好，佢哋成立群組互通消息，去支援染疫嘅同事及家人，例如送物資送藥物咁，呢個群組發揮咗好大作用。服務方面，派飯唔停得、沖涼唔停得、露宿者支援唔停得、藥房唔停得、臨終照顧唔停得……我專注睇住唔停得嘅服務，Senior同事就照顧啲同事，我感覺到萬事互相效力。」
「人生唔係喺最享福嘅時候同同事一齊，而係有困難時大家點樣一齊行。」
Josephine這番話令我十分感觸。香港地，甚少人認為同事可以做朋友，感情可以像家人。我跟她說：「你哋家人感好強烈，好有愛！」她頓時眼有淚光：「千八位同事，千八個家庭，如果我哋都唔守好，我哋冇資格去關心人哋嘅家庭。正如你唔照顧好自己嘅父母，有乜嘢資格去照顧社會上嘅老人家呢！」她視同事如足球隊隊友，大家關係像家人，有著共同目標，千八位同事互補不足，「我唔介意同事幾多點走（放工），我介意同事走嘅時候開唔開心。」
每間公司、每個組織都有自己的文化，人來人去出出入入確是平常。Josephine有她的一套理論：「我好鍾意同事走咗之後再返嚟做嘢，我研究過，第二次返嚟嗰啲唔會走㗎啦。最近有同事去咗另一個機構，3日之後返嚟，佢問我畀唔畀佢返，我話畀！即畀！佢又好開心，我又好開心。」
打工仔，開心這兩個字實屬罕貴。Josephine保持好心情的抗壓Me Time，除了會睇書和聽音樂，還有煲劇，「我唔會成套劇播晒先睇，我鍾意一集一集追，無論嗰日工作幾辛苦，追劇時就會好似有塊朱古力食咁。我覺得韓國嘅電影、劇集、K-Pop好細緻，就係呢啲細緻位一個唔覺意就成就改變，對我做嘢好有幫助。」Josephine還會做Gym保健，「疫情令我喺屋企睇YouTube跟住鄭多燕跳，即是做HIIT，同時亦要控制飲食。」
為了同事的身體著想，她甚至想過為過胖的同事設計健康減肥計劃：
「我好鍾意呢句說話：『無論你銀行戶口後面有幾多個零，冇健康冇咗個1字，後面嘅零都係零。』唔係做運動重要，而係恆常地做運動好重要。」
盼能「精準扶貧」
加入聖雅各33年的她，現在最想做甚麼？她零秒回答：「首先係『精準扶貧』，最近我有機會學習同了解，睇睇點樣掌握大數據去分析乜嘢人要扶、點樣扶、用乜嘢方法扶，因時制宜因地制宜。香港需要科學化地、精準地扶貧。此外，基層嘅健康都想多做，試問一個單親媽媽湊住兩個小朋友，可唔可以等幾個鐘急症？另外，如果30、40歲人士中風，你唔理佢呢，佢呢一世就完，如果喺黃金治療期為佢提供復康，唔單止改變到中風病人，係為整個家庭帶嚟改善。」
最後，Josephine溫提各位《晴報》讀者：「人到中年，距離我哋可能走嗰日仲有幾十年，我哋副偈（身體）就要自己Keep好，呢個係我哋自己嘅責任。只要有恆心，唔一定要做Gym囉，一日行15分鐘半個鐘、上樓梯落樓梯搭小巴轉車…唔係唔食，而係有節制地食曳嘢（雜食），尤其是女性更加要有動力去Keep好身體，因為我哋撐住半邊天，照顧緊成頭家！」
撰文：陳小芝
攝影：陳健珊
編輯：陳潔雯
U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】