消費者委員會總幹事黃鳳嫺（Gilly）永遠給人公正、謹慎、理性之感，每月一次的《選擇》月刊記者會中，都見到她極具公信力的發言，實在太想每次購物前，都徵詢她的意見！我深信經常有人這樣做。
「又唔係經常！」聲音動聽的Gilly說：「朋友久不久會問我買洗衣機、乾衣機、床褥、買人壽同醫療保險嘅意見，又或者我哋出咗啲好震撼嘅產品測試報告當日，就會收到兩、三個WhatsApp問我邊隻牌子好，通常我唔會評論某隻牌子嘅，只會建議大家購買時要留意乜嘢。」加入消委會前的Gilly，原來都會被人搵笨、都會衝動消費、都會純粹看牌子和價錢便去購買，「做咗呢份工10年，我精準咗唔少，不論購物、搵服務、飲食同環保習慣都被影響。」
過去10年，誰人影響她改變？「一班同事。負責產品測試嘅同事都係專才，做有關電測試嘅係電機工程人員、做化學品嘅係化學工程人員、做食物試嘅係食品科學家，大家會好理性咁分享意見。有時我買一啲自己唔熟識嘅嘢之前，都會搵相關同事問一問」她說。
消委會一姐以柔制剛
情景題：消委會一姐走進店舖購物，大家會認為她在突擊巡查嗎？如果我是店東，我會答：「肯定啦！」市民見到她，又會立即上前報料嗎？Gilly：「唔同情況有唔同嘅反應，一般市民大眾見到我，會好友善咁同我打招呼，然後話我知邊一期《選擇》月刊幫到佢。有時入到一啲家常小店，明顯會覺得佢哋嘅服務特別殷勤，而最得意嗰個位、譬如去到海味舖買嘢畀錢時，佢哋會話：『計埋個膠袋錢㗎喇。』驚我話佢哋呃秤，所以刻意表示足量，而數錢亦會數得好清楚，以行為嚟表達佢哋知我係邊個。」這一切，都是消委會公平公正、不偏不倚夠「硬淨」的結果，那麼，代表人物Gilly的硬淨又來自哪裡？從工作磨練出來？父母教導出來？還是天生？
「練習太極多年我學識以柔制剛，我會儘量用軟嘅方法去處理問題，唔得先會硬。我嘅同事團隊啲報告全部根據數據、根據科學、研究及分析得出結論，作為發言人去表達時，一定要好Firm先至有公信力。」
這一種Firm，跟Gilly父母的教誨有直接關連，「我嚟自一個小康之家，比上不足比下有餘，父母供書教學，佢哋話你讀得幾多得幾多，一定要好踏實咁行你嘅人生路，我會用『落地』同『踏實』嘅人生觀去形容。『硬淨』就係要捱得，作為一個普通打工仔，由細（低職位）做到而家，過程必定經過歷練，有歷練會令你變得硬淨。譬如我以前個樣好童顏，Baby Face呢樣嘢有好有唔好，人哋望你覺得你後生、襟老，但唔好處就係年輕時出嚟做嘢，啲人覺得你細個就認為你好好『蝦』，會將佢哋唔鍾意做嘅嘢交晒畀你，但我唔介意，我覺得做唔死人嘅，當係一種學習囉！」回望過去，Gilly的磨練就像打拳，相同的動作不斷重複又重複，變相把根基打得好穩，變成今日覆核資料時，能一眼就看得出錯處的「雷射眼」。
- {{hket:inline-image name="p33.jpeg"}}{{/hket:inline-image}}
- {{hket:inline-image name="IMG_1762_20221214002832.JPG"}}{{/hket:inline-image}}
- {{hket:inline-image name="IMG_1751_20221214002000.JPG"}}{{/hket:inline-image}}
- {{hket:inline-image name="photo.jpeg"}}{{/hket:inline-image}}
- {{hket:inline-image name="IMG_1753_20221214002143.JPG"}}{{/hket:inline-image}}
Gilly先後效力多間大機構，擁有豐富的商業管理經驗，成為消委會總幹事10年，跟以往的工作相比，最辛苦的工作原來是…
「現在！一有大型嘅測試報告，我真係要食番一個禮拜人參。每個報告對我嚟講都好似生咗個仔咁！」
崇尚健康生活的她，信奉工作時工作，遊戲時遊戲，「Work-Life Balance好重要，平時點忙都好，一定要畀Me Time自己。我承諾過同事會令佢哋有Life，就算星期一至五有幾忙，我星期六日唔會搵佢哋。我以前都有24小時奪命追魂Call嘅老闆，所以我唔會咁樣做。有啲老闆好鍾意鬧人，我以前都有咁嘅老闆，咁你就會知道自己唔好做一個成日鬧人嘅老闆。」
習慣忙碌：要急市民所急
練了太極十多年的她，覺得人生並不複雜，生活簡簡單單就最好，只要吃得簡單一點，休息時休息，勤做運動，多練習自己的內氣，復元力自然會強一些，抗疫能力亦會高一些，「太極講求平衡，首先身體方面，個人夠平衡就唔會咁多病痛；第二個好處，睇事物方面會比較客觀，睇事情嘅角度亦會深啲、闊啲、全面啲；第三個好處係情緒上面嘅平衡，任何一個人做到高層，都會好大壓力，練習對情緒管理方面超好。同事都知，EQ係我嘅強項，我唔會鬧人，亦唔會發脾氣，發得脾氣鬧得嘅已經好嚴重。」除了內在自我修煉，Gilly還有她的一套外在保養心得。她說：「皮膚科醫生通常都會叫我哋保濕、防曬，同埋食維他命C，我唔會買啲好貴嘅護膚品。」
其實我也不會購買昂貴的護膚品，因為我也是消委會測試報告的忠粉。消委會去年10月比併了17款保濕面霜，其中獲好評的一款最平只不過$129，評分比$2700那一瓶還要高，證明產品絕非價錢越貴越佳。令總幹事Gilly印象最深刻的測試報告，又有多少個呢？
「鹽。」她秒回：「佢可以由10蚊一包嘅普通鹽，貴到幾百蚊一樽嘅海鹽，但睇完之後原來平嘢係好好嘅，係好安心冇乜雜質嘅。另一個檢測係廁紙，估佢唔到原來不論格數、柔軟度、長度等等會有咁大分別，我係根據測試結果去買廁紙嘅。食油，啲人對油好有研究㗎嘛，個結果好多人都關注，但發現好貴好貴嗰隻，都不敵一支最基本。」
「仲有奶粉，好多爹哋媽咪好緊張，嗰次個報告一出，癱瘓咗我哋個伺服器（Server），實在太多爹哋媽咪、爺爺嫲嫲入嚟睇喇！而最後，就係保暖內衣。當時一隻平價牌子贏咗外國名牌，平價嘅立即被全港市民掃貨，掃到佢哋驕傲地買全版報紙廣告，去答謝消費者支持，我諗除咗好生意之外，對佢哋團隊嘅士氣亦有好大提升。」
疫情爆發至今3年，我們不自覺地已習慣了新常態，Gilly和她的團隊，則習慣了忙碌：「消委會一定要急市民所急，譬如我哋要即刻做酒精測試啦、口罩測試啦、負離子空氣淨化頸鏈啦、UV消毒燈啦，有啲效用不大，好似負離子頸鏈同UV消毒燈咁，唔做你咪唔知囉！但做，又要去搵方法，因為啲咁新嘅產品，唔一定有國際標準畀你去跟，亦無太多實驗室可以做到，要令到件事發生，對我哋嘅團隊造成好大壓力，加上我哋自己都要抗疫啦，所以勁忙。」
疫情期間，消委會還要處理大量消費者的投訴，「取消機票、取消學習班、新人結婚酒席問題等等，總之你使錢後退唔到款嘅，就會嚟投訴，投訴部啲同事同樣好大壓力。所以成個疫情，對消委會嚟講真係唔易過嘅一段時間，好彩大家都捱過咗，亦好開心可以幫到個社會。去到第五波時，好多人催促我哋快啲做快速抗原測試棒測試，但其實要做唔係咁簡單，點樣去搵啲中招嘅人畀我哋Test呢？於是我哋立即變通增設搜尋器，調番轉將外國已通過審核嘅快測棒名單例出，等大家核對手上拎住嘅牌子，上榜嘅，你咪安心使用囉！」
未來的「選擇」？
消委會將於2024年4月踏入50周年，而1976年11月創刊、每月15日推出的《選擇》月刊，亦已經陪伴了我們46年。Gilly這位總幹事，笑指自己不會在《選擇》月刊出版前放假，她要放，都會考慮16日或之後。
「每期《選擇》月刊由構思題目、申請審批、落實做法，到稿件嘅第一度把關：分折角度啱唔啱，係咪照顧到消費者關心嘅事項；第二關：寫法清唔清楚；第三關：圖文並茂容唔容易令消費者明白；第四關：新聞稿個角度攞得準唔準，吸唔吸引到讀者注要；第五關：記者會嘅發言，仲有第六關：出版之後個市場反應，我都全程參與。題材方面，仲有好多產品我哋未Test過，市場上亦有好多訴求，總之會繼續入屋，繼續因應市民大眾日常嘅生活，送上最新資訊。」
被問到現階段最想做甚麼時，Gilly表示：「實體市場以外，近年好多產品喺街買唔到，要網購先至有，點樣確保消費者網購嘅產品安全，同埋物有所值呢，係另一個我哋要去處理嘅板塊。我哋嘅預視能力要好高，要知道世界發生緊乜事，要早啲做定嘢，去話畀消費者、話畀業界知點樣得到保障，例如金融機構資源多啲，FinTech可能行得快啲，但當中有好多陷阱、手法及漏洞，好似個人資料保護、扣錯數或其他隱閉式對消費者不利嘅問題，所以我哋嘅工作比以前難度更高。」
最後，Gilly寄語《晴報》讀者無論大家的工作是甚麼，最重要是保持年輕的感覺，「消費環境每天在變，我要保持青春、保持精力，當自己二、三十歲咁有活力及熱誠，先至可以推動團隊嘅進步。」
撰文：陳小芝
攝影：陳健珊
編輯：陳潔雯
U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】