劉鑾雄記者會丨大劉首次澄清塞春卷乒乓波傳聞 李嘉欣係一生中最愛「The ONE」？

劉鑾雄日前喺皇室堡商場同前女友呂麗君（現名呂姵霖）同場現身，即惹來外界揣測二人復合，大劉立即對此出聲明澄清，不過今日早上11點仍再開記者會交代事件。記者會期間大劉幾乎知無不言，更表示自己聽埋唔少閒言閒語，忍咗三十幾年，仲澄清咗多單「都市傳說」。

同場加映： 劉穎鏇自小患嚴重濕疹曾向媽媽發脾氣 爸爸陪來港發展與母分隔：我好自責

{{hket:ul-video id="7331"}}{{/hket:ul-video}}

記者會期間，大劉突然問到在場記者「有邊位有過廿年資歷」，問記者有冇聽過當年傳佢有特殊性癖好嘅都市聞說，話：「我想請問你有冇聽過我以前喺福臨門塞春卷嘅故事？唔好講話我冇做過，諗過都絕子絕孫！再遲吓（啲人）話我鍾意畀人塞都得啦，你屈我有咩咁難？（話我）佢唔係溝女，佢鍾意玩男人都得！」

佢表示過去有好多女朋友，娛樂圈嘅只佔1%。承認會金錢上照顧舊愛，又大爆有人貪得無厭，冒佢簽名呃錢：「有啲冇良心嘅，有啲賤到無倫嘅。我講娛樂圈都有唔少㗎，賤到無倫嘅人。我呢度講兩句吖，就唔會開名喇，費事搞出大鑊嘢。以前有個女朋友，兩姊妹夾埋冒簽我名，整張假文件去電油公司，申請張油卡，佢又唔好彩畀我會計部check咗出嚟，我都冇去報警，如果報警就衰梗。我淨係話『喂，你哋太狼喎，咁都得嘅』...我淨係提佢，如果我報警佢死硬嘅...我都冇咁做。」

{{hket:inline-image name="3.jpeg"}}{{/hket:inline-image}}

之後記者問到大劉點解當年唔澄清時，佢就有少少激動：「100個（傳聞）過嚟我澄清99個，咁我唔澄清嗰一個啲人咪會話係真？澄清得幾多個？我講嘢係咁大聲，唔係勞氣，仲有嗰日唔知睇邊齣電視劇，影射我，話我喺飛機鬧咗人幾句，鬧到人喊，之後掟張支票喺人哋塊面！識我嘅人就知我從來唔帶支票喺袋，因為我簽名好核突，但係有人咁作，乜嘢我都見過。箇中痛苦唔係你哋會明白，（我）衰在咩嘢？（只要）我唔係核突佬，多幾個女朋友，唔使攞綜援，唔使住劏房，啲人就唔妥你。」

另一個謠言就係指當年大劉為奪取李嘉欣芳心無所不用其極，除咗外界盛傳嘅報章頭版示愛廣告外，2009年大劉將其位於尖沙咀嘅商場命名為「The ONE」，表示李嘉欣係「一生中最愛」。不過大劉就打破咗呢個多年嘅「童話故事」，記者問到「The ONE」係咪佢「一生中最愛」，佢不屑咁「超」咗一聲：「我喺私人、工作上從來都冇諗過一個字The ONE，The ONE係我個仔（劉鳴偉）改，第一我英文好水皮，第二係稿有人交嚟，叫佢秘書去登，借我秘書去呃個老襯啦！『The ONE』搞掂咗啦，唔容易，我都戥佢開心。」

大劉又激氣指呢個世界乜人都有：「仲有啲，你聽見，真係唔好爆出去，或者唔好點大做文章，（有啲人）結咗婚兩三年，一年都同我攞幾個鱷魚皮又鑽石嘅手袋啦！千祈唔好以為我畀個手袋，大家出嚟執番劑，涼茶就可能有...我諗我而家肯去執，排到去黑龍江呀！我講笑咋，而家行路都行唔到...」記者問到大劉有邊個緋聞女友係值得佢大讚，佢就斬釘截鐵咁話娛樂圈圈外有，但圈內就絕對冇：「sorry冇！係絕對絕對冇。」

撰文︰娛樂組