使費一闊三大 買車前三思

兔年伊始，先祝各位讀者萬事大吉、工作如意，最重要當然是身體健康。

新正頭返工，同事們都只是循例返公司打下卡，收拾下辦公室座位，真正工作未殺埋身，所以大家都頗輕鬆。新年少不免派利市，見到Sales Team的Jackal，知道他即將結婚，所以恭喜他下年加入派利市行列。

殊不知Jackal一聽到結婚，即刻無心機。何解？原來為籌備婚禮加買樓，他連愛車都要變賣，才算勉強夠數。

曉陽就對他說，車無了可以再買，老婆則只得一個，結婚這麼重要的事，當然要好好睇睇。

Jackal就表示，其實賣車都不是幫補到太多，反而是聖誕前和未來老婆計數，一個月養車要多少錢，未來老婆一聽，即刻面都黑，叫他之後無咁上下收入，都不要再養車。

Sales Team同事搵多少錢，曉陽雖然不知道確實情況，但都略有所聞，像Jackal這類入行無耐的，肯勤勤力力工作，都有幾萬元一個月。但都不夠養車？

原來養車費用絕非簡單，主要有幾個重點。例如停車場的費用，月租3,000元已經是最低消費，倘想要有蓋的固定車位，起碼要4,000元；如果像Jackal這樣，公司沒免費車位，揸車返工需要雙倍泊車費，可能每個月要花8,000元，還未計算假日出外遊玩的泊車費用。

其次是油費，如果日日揸車，每月2,000元，甚至3,000元都走唔甩；即使只是假日出車一族，都起碼要700元以上的油費。若然加上每年牌費、保險費、保養、檢查、洗車及驗車等等，即使很節儉，都有可能要7,000元至8,000元，甚至萬元以上都有可能。

聽到呢一刻，曉陽明白Jackal未來老婆的驚訝，即使幾萬收入一個月，都要拿三分之一去養車，所以會覺得是高昂的開支。也難怪當年曉陽有個同學，畢業後加入政府醫院做放射治療師，當下立刻買車滿足自己，殊不知半年後，已經棄車而逃，真相此刻大白了。

（本欄逢周四刊登）