下月倫敦開騷 張敬軒順道全家旅行

剛踏入42歲生日的張敬軒，昨日聯同馮允謙（Jay）和陳蕾等出席品牌活動，軒仔表示今年生日難得可以放假，故留在家中靜修。他說︰「主要諗番過去41年有無事需要檢討，但我發覺自己嘅心態係無變過，所以提醒自己要成熟啲。」軒仔提到下月到倫敦舉行巡迴演唱會，屆時會帶父母同行，一家順道去旅行，「咁多年嚟好少同父母去旅行，所以今次我會早一個禮拜出發，趁開騷前帶佢哋去玩下。」

此外，有傳商台今年首場拉闊音樂會，將由陳蕾和MIRROR成員陳卓賢、江𤒹生打頭陣。昨日陳蕾回應︰「我真係守唔到秘密，我哋未合作過，好期待呢次合作。」陳蕾又指近來忙於擔任《全民造星V》的導師，並驚覺責任之大超出她所預期。同為導師之一的Jay，笑言不少心水學員都被陳蕾出茅招搶走。

採訪︰Pauline