【聲明】港生活網站並無進行電話推廣活動

拍《風再起時》怒摑梁朝偉 郭富城︰好刺激似演舞台劇

發佈時間: 2023/02/08

久未在港亮相公開活動的梁朝偉(偉仔),昨日與郭富城(城城)、譚耀文和吳卓羲等到尖沙咀出席新戲《風再起時》首映禮。戲中城城「奉旨」掌摑偉仔,他戲言不捨得落手,該鏡頭更拍了三次。城城說︰「攝影師力求完美,所以唔錯得,好刺激,好有舞台劇feel。」

翁子光執導的《風再起時》,拍畢五年才正式在香港及內地公映,集合梁朝偉及郭富城兩大影帝,獲觀眾熱烈期待。戲中有城城怒摑偉仔的鏡頭,城城前晚於首映禮台上稱︰「點捨得打我哋嘅梁朝偉呀!」其後城城和偉仔一起受訪,異口同聲對作品終於推出大感興奮。城城說︰「部戲係翁子光、我哋成班演員用心拍出嚟,香港影圈需要有質素嘅電影。」該片背景是香港50、60年代,圍繞四大探長的故事,當中有一幕戲是偉仔彈琴而城城跳舞,兩大型男鬥型。偉仔說︰「彈鋼琴場戲真係好深印象,嘥咗好多時間,隻爵士樂又好鬼快,個古董鋼琴其實係彈唔到聲嘅,乜咁大整蠱,但都要照彈啦,不過同一班專業演員合作係好好嘅經歷!」毫無鋼琴底子的偉仔,為這幕彈琴戲,下了不少功夫,每天練足八小時,更被太太劉嘉玲笑住投訴每天只聽到琴聲。

偉仔苦練鋼琴

另外,提到戲中被城城怒摑一幕,偉仔戲言好小事,自己最擔心眾人出錯便要重拍,全因這幕是以一鏡到底拍攝手法。城城則笑言︰「私底下點打得落手,不過攝影師力求完美,呢個鏡頭拍咗三個take,過程好刺激,好似演舞台劇嘅feel,心態係好玩,但亦有無形壓力。」問到城城事後可有呵番拍檔?偉仔搶住回應︰「唔使!作為演員,大家都好享受同投入個角色,大家最怕係講錯對白啫。」近來多套電影票房報捷,對新戲票房有無信心?偉仔表示︰「希望多啲人鼓勵、支持下,唔想畀咁大壓力導演,當然希望票房好。」

採訪︰Pauline

撰文︰Steven

美術︰梁政敏

拍《風再起時》怒摑梁朝偉 郭富城︰好刺激似演舞台劇

《風再起時》昨晚舉行首映禮,各演員及導演舉杯預祝成功。

拍《風再起時》怒摑梁朝偉 郭富城︰好刺激似演舞台劇

偉仔大爆戲中彈古董鋼琴,原來彈不出聲。(網上截圖)

拍《風再起時》怒摑梁朝偉 郭富城︰好刺激似演舞台劇

偉仔被城城摑至眼鏡飛脫。(網上截圖)