扮山寨Lisa冧陳豪 龔嘉欣苦練K-pop

新劇《新四十二章》首周跨平台直播收視最高23點，成績理想。而主角龔嘉欣在前晚一集中，講述她為了冧陳豪，扮成BLACKPINK成員Lisa，大跳K-pop誘陳豪。一頭淡紫色長直髮的嘉欣，穿上超緊身露腰上衣，在長達半分鐘的Solo演出中，隨住強勁音樂扭動身體及纖腰，跳得有姿勢有實際。原來嘉欣有跳舞底子，曾經學習西方民族舞五年，亦都學過踢躂舞、拉丁舞等。

嘉欣直言這場戲對她來說一點都不簡單，「我覺得跳舞難過打戲，始終平時都比較少接觸呢類型嘅舞，而且要跳得好睇係好難，不過最困難係忍笑，因為對住陳豪實在太搞笑，佢嘅反應好有喜感。」