晴報VIP｜聯乘音樂人 以歌鼓勵煎熬中病人 鄧智偉教授：「洗腎換腎病因 糖尿病係冠軍！」

香港腎科權威，香港大學內科學系講座教授及余氏基金教授鄧智偉（Sydney），在醫學研究方面成績斐然，卻是音樂圈的一個損失。他沒有成為歌手，沒有獲得任何歌唱獎項，但不時聯乘樂壇中人開辦慈善Show，包括去年12月尾和趙增熹合作的《得閒飲茶慈善音樂會》，實實在在是「醫學界中年好聲音」。

{{hket:inline-image name="quote-04.jpg"}}{{/hket:inline-image}}

{{hket:inline-image name="1.jpeg"}}{{/hket:inline-image}}

{{hket:inline-image name="IMG_1725_20221213212155.JPG"}}{{/hket:inline-image}}

「我哋呢幾年經歷疫情，大家曾經飲唔到茶，我聽到有人話試過幾年冇見家人，有人甚至話啲仔女喺外國返到嚟，連個樣都變晒。雖則有Facetime、WhatsApp、Video Call，但都係爭啲，就算你今日嚟，都會穩陣啲先做個RAT快測，大家都好驚！所以得閒飲茶（音樂會意念）簡簡單單已經得，貼地唔使花巧。」

有醫學研究指唱歌有助減壓，甚至減肥和幫助提升免疫力等等，病人遇到「歌手級」醫生，豈不是身心都得救？他笑著說：「大部分病人都唔知我鍾意唱歌，我都好想參加《中年好聲音》，但佢哋一定Foul（淘汰）我！」

醫生的「唱歌之路」

Sydney鄧教授的唱歌之路，原來跟「AO歌王」楊立門（Raymond）有關，「大概2009年，前香港防癌會主席高永文醫生搵我入去幫手，咁我就加入咗防癌會。去到2017年，Raymond開慈善演唱會，而防癌會係受惠機構。Raymond提議不如派個代表同佢合唱，當時環顧執行委員名單當中，最厚面皮、最唔知醜嗰個就係我。其實疫情之前，防癌會每年嘅聯歡Party，我都會上台同大家玩下咁唱下歌。」

積極參與社會服務的Sydney，經常為鼓勵病人而開金口，「腎病病人好慘，佢哋由腎衰竭開始，要經歷洗腎，可能有機會要換腎，換腎後如果唔Work又要返番轉頭洗腎，嗰條治療路好長，講緊以十年計，好煎熬！2005年香港腎科學會搞咗一個《舊曲新填腎友詞》活動，畀洗腎、換腎、透析嘅病友填詞，憑歌寄意抒發感受，當時反應好踴躍，仲搵咗鄭國江老師擔任評判。鄭Sir好好，佢建議搞工作坊教病友填詞，最後鄭Sir喺病友作品中揀出幾首，錄咗隻CD。另外，每年3月都有全球活動『世界腎臟日』，香港亦會參與『世界腎臟日在香港』。雷兆輝醫生係香港腎臟基金會主席，佢同太太都好鍾意跳舞，所以會搞非常盛大嘅跳舞活動，聚集病人同家屬、藥業界友好，同埋全港十幾間醫院嘅醫生、護士出嚟跳。雷醫生話不如我哋啲醫生搞個短劇啦，中間唱歌。有一位好鍾意填詞嘅關子凱醫生，佢係屯門醫院腎科顧問醫生，佢為短劇歌曲填上新詞，我就負責唱，咁樣又連續唱咗3年。」

去年12月尾，Sydney和趙增熹合作《得閒飲茶慈善音樂會》。大家都知，一般人的歌藝難以感動趙增熹老師。他們的音樂緣到底結於何時？ Sydney的歌聲感動到他？「阿熹我中學年代喺聯校音樂活動中認識，佢好有善心，我指慈善嘅心，佢話有乜嘢都可能搵佢幫手，所以並唔係我有啲乜嘢感動到佢。」

自小認識的Sydney和趙增熹，前者投身醫療界，而且成為香港十大傑青；後者做了音樂人，街知巷聞，「我做到某一個位，發現除咗初初出嚟實習做醫生好忙，做到咁上下年資，就可能會參與一啲Good Will項目，例如公共事務又或者為非牟利組織出力。一諗到搞活動，自然就會同音樂扯上關係，跟住就開始搵阿熹。」除了鄭國江和趙增熹，他的好友名單中還有另一位音樂人的名字。

最近Sydney在IG Po了一張合照，他和跟他同名同姓的唱作人鄧智偉互動，並寫著 —《燃亮愛心》 曲：鄧智偉、詞：鄭國江、編：趙增熹。至於「唱」，不用問，肯定就是鄧智偉和鄧智偉吧！

Sydney表示：「2017年做完Raymond音樂會嘅嘉賓後，終於喺2019年搞咗我第一個Concert。搞完之後，朋友話一定要介紹我認識一個人，佢同我同名同姓，而且好想認識我。我話我不嬲都有留意『鄧智偉』，佢係TVB多產作曲人，亦有同學問過我係咪秘撈，我答梗係唔係啦！終於我哋2019年認識咗對方。」兩人一見如故、相逢恨晚、互動頻繁，「其實早前我哋口噏噏過要搞『鄧智偉x鄧智偉』，大家喺意念上一致，但後來佢去咗內地發展，直至舊年年尾我開Concert，於是佢決定作隻歌畀我，咁就有咗《燃亮愛心》呢首歌。」

{{hket:inline-image name="0001-28_20221213105737.JPG"}}{{/hket:inline-image}}

因哮喘立志做醫生

自小患有哮喘的Sydney，曾飽受「扯蝦」之苦，幸而在小學時期斷尾甩難，沒有影響他唱歌。當年康復之後，他立志成為醫生，但何解他主打的不是耳鼻喉呼吸道，而是腎科呢？

他說：「哮喘驅使我想做醫生，因為病發時『扯蝦』好辛苦。點解唔做呼吸道？陳百強嘅歌詞咁，莫道我哋選擇邊一科，嗰科嘅人亦能選擇你。我哋唔係畢咗業就完成咁簡單，之後仲要考專科試。專科試之前、畢業後中間，仲有一個Intermediate Exam（期間試），要考到呢個試先至再分科。我哋亦會輪流受訓，3個月做呼吸科、3個月做腸胃科、3個月做腦科…一路咁輪落去。考期間試嘅時候，我剛剛做緊腎科，考完個試之後，腎科個『老闆』話：你嚟做腎科啦！咁我就行咗腎科之路喇。」

Sydney認為腎科較「多嘢諗」，例如要替病人控制血壓、酸鹼度、水分、毒素等，醫生要處理的範疇既多且複雜，又例如鈉的高低、鉀的高低要怎樣處理，血過酸、過鹼、腎功能差又會怎樣，很多東西要去考量。說到「多嘢諗」，香港人人害怕患糖尿病，卻並非個個都有控制好自己的升糖指數。我們愛吃甜品，十分堅持的；我們愛運動，但欠了持久力。衞生署說每星期應進行最少150分鐘中等強度的體能活動，即每日要做運動30分鐘，寫到這一點，筆者慚愧！

Sydney說：「由九幾年開始，已經講緊『引致洗腎或換腎』嘅病因，糖尿病係冠軍。90年代醫管局推出Renal Registry（腎病名冊），因糖尿病腎病導致末期腎功能衰竭嘅百分比，當年大約30，而家已經飆升到50%，即係每兩個要洗腎嘅人，超過一個係因為糖尿，都好難唔係因為『食返嚟』同『郁得少』㗎喇。1型糖尿係所謂先天性，而2型糖尿最主要因為BMI過高脂肪太多，引致產生抗胰島素，我自己接觸過最年輕嘅2型糖尿病人只有20幾歲。」                        
很多人都不知道一旦患了糖尿病，若干年後，其併發症會引起很多身體毛病。他續道：「糖尿病其實係一個血管病，血糖高會影響血管內膜，我哋全身都有血管，佢唔單只會導致腎病，仲可以影響到心臟病、中風、眼底出血，甚至周邊血管，有啲人血去唔到腳，血管塞晒，搞到要截肢，所以佢係一個系統性全身血管嘅病，只不過睇吓邊個器官出事先。」

盼更多人關注腎病 鼓勵腎友勿放棄

既然甜品致肥，過胖害己，就請身形標準勻稱的Sydney分享其健康和飲食心得。他說：「我都好鍾意食甜品，不過唔會餐餐囉，會睇住個份量，食完之後會做運動。血糖高其實亦會加速衰老，而最容易出現嘅就係白內障，晶體受血糖影響會變得混濁，而白內障只係冰山一角，代表身體血管已經出問題。講到健康心得，我好想定時做運動，但做唔到，亦好想定時作息，亦做唔到，我唔係太夠瞓。時間分布方面，我冇乜點分布，啲工作每日會飛埋嚟。醫生其實冇得收工，可能個病人日頭驗咗血，到夜晚先出報告，我就會心思思想睇報告，因為上咗心，想睇吓有乜Action要take，唔同其他事業咁而家收工就收工，聽日再做。」

Sydney鄧教授每日忙於醫學培訓與研究，除了教導本科生和博士生，他在研究上最希望找到新的靶點，從而成為將來一個新嘅治療，「我哋喺得大學工作，都係想喺研究上有突破，搵到新靶點，日後會有新嘅藥去打擊炎症、纖維化等問題。治療糖尿腎病，除咗近幾年有一隻叫『鈉 — 葡萄糖協同轉運蛋白抑制劑』出咗嚟，有效控制到血糖、體重、血壓、減低腎衰竭心衰竭風險之外，2002年打後有十幾年空窗期，中間所有研究都Negative，啲人覺得腎科冇新藥出，Cancer好多新藥喎，其實並唔係研究員懶呀！」一直大力推動器官捐贈的他，亦希望香港有更多人關注病人長久等候之苦。

「CODR（中央器官捐贈名冊）嘅數字係有上升嘅，但未如理想，最叻嗰年有100個（捐腎），但呢幾年都低過100，呢方面想做得好啲嘅，因為輪候嘅人實在太多啦。洗腎病人嘅生活質素同埋存活率，都相比換咗腎低，即使個腎唔係咁理想，都好過要繼續洗腎。」

Sydney在訪問中多番提及到病人洗腎之苦，痛病人的痛憂病人的憂，勸勉腎友們要積極面對，「要洗腎、透析係一個煎熬，無論係家居式嘅腹膜透析，抑或返嚟醫院做嘅血液透析，都好煎熬，但我都呼籲病友不要放棄，要遵守戒口，替代治療始終唔能夠替代到腎臟功能，戒口會令身體狀況好啲，令心臟、心血管功能好啲，最怕到有朝一日有個電話打畀你，喂有個腎啱你喇，但你啲器官功能唔得，換腎風險大喎，所以一定要管理好自己，保持『隨時準備接受移植』嘅狀態。」

{{hket:inline-image name="0001-31_20221213110109.JPG"}}{{/hket:inline-image}}

U Lifestyle App睇盡《晴報》新聞資訊及自家節目
↓↓同步更新、更快更順↓↓ 
【免費下載】 

撰文：陳小芝

編輯：陳潔雯

攝影：陳健珊

{{hket:inline-image name="p22.jpeg"}}{{/hket:inline-image}}