林敏驄寸譚詠麟資質差

林敏驄（阿驄）將在下月於西九文化區開騷，日前他接受無綫娛樂新聞台節目《Star Talk》專訪，大談80年代填詞的趣事，他筆下包括有譚詠麟（阿倫）的《幻影》和《霧之戀》等經典作品。阿驄大爆當年為了趕工，阿倫極速完成《愛在深秋》錄音，他更取笑阿倫資質差︰「佢次次都要我唱一次畀佢聽，有時要唱埋demo，好似《忘不了你》有啲音應該點樣唱，驚佢有誤會，你知佢資質有限啦。」

另外，阿驄過往曾與曾志偉合作多首二次創作歌曲，當中以改編自郭富城《狂野之城》的《狂野的蕃茄》最深入民心，阿驄坦言與志偉一拍即合︰「嗰時我開咗個錄音室，諗緊搞咩好呢？跟住諗起自己讀書時成日改歌詞，咁啱嗰時曾志偉又好紅，就去撩佢合作，佢又肯喎，結果嗰隻碟一出就賣咗廿萬隻（四白金）。」