《中年好聲音》比賽進入白熱化階段，正以為各參賽者都磨拳擦掌鬥過你死我活，沒想到他們老友鬼鬼，私下會聚餐交流。涂家堯、支嚳儀這對拍檔，合唱《Endless Love》大獲好評，涂家堯稱一心只為比賽，卻結識到一大班志同道合，成為好朋友；賽果是未知之數，他們認為每次演出能令觀眾留下深刻印象，比名次來得更加重要。
中年好聲音丨支嚳儀性感唱腔俘虜評判贏高分 超強媽媽做老闆烘焙店擁多家分店【下一頁】
39歲的「婚紗銷售員」涂家堯和36歲的「自助烘焙店東主」支嚳儀（Venus）全因熱愛唱歌，無懼一切踏上《中年好聲音》的舞台，過五關斬六將走到十五強的淘汰賽。兩人較早前合唱環節的一曲《Endless Love》除了獲得85分高分外，在網上的評論和點擊都非常厲害！Venus有家室，事前向老公「備案」，說︰「我哋第一次綵排嘅時候，佢著件勁緊身衫，突然間好深情咁唱...我冇辦法直視佢對眼，笑到噴出嚟，唱歌老師都叫我忍住笑！所以我哋真係要不斷練習。」雖然評判讚不絕口，涂家堯稱事後兩人最緊張是檢討需要進步的部分，「我同Venus有共識，就係要做一個作品，好睇又好聽嘅，將來唔知有冇機會演出，可能有一日大家想聽或者想唱《Endless Love》時就會揀我哋呢個版本。」
跟《聲夢傳奇》或其他比賽不同的是，《中年好聲音》的參賽者相對地較有歷練、成熟，他們對比賽得失看得很開，Venus：「每名參加者都係中年人，大個仔、大個女，至少我哋係好平常心去對待比賽，至而家呢一刻都唔會定位自己係明星。感覺有少少似商會，每人背負自己事業、人生理念，然後喺人生路上一個落腳點遇到，沉醉喺興趣入面，好似喺音樂游泳池上暢泳咁！好好發揮自己年少時嘅興趣，留下好作品。」涂家堯坦言性格好強，參賽時有爭勝鬥心，「我初時同佢哋食飯都話，我係嚟比賽唔係嚟識朋友...幾廿歲人我冇朋友咩？要識出面點都識到啦！拍攝耐咗，大家一齊經歷好多第一次，一齊去慌張，有少少共同進退嘅感覺，慢慢我真係畀大家融化咗，自自然然變成戰友。」
中年好聲音丨鄺文珣富商老公應德榮參賽圓夢 拒接家族生意 創業失敗險釀婚變【下一頁】
涂家堯笑言比賽最困難的是面對鏡頭，過往他參加過不少歌唱比賽，但上電視是第一次，加上他常不自覺地「黑面」，工作人員也勸他要多笑，「我同Venus係南轅北轍，佢成日笑，我畀人話好似嬲咗全世界咁。以為我因為低分而黑面？其實我係好認真咁聽緊評語，表情管理仲學習中，觀眾千祈唔好誤會我。」Venus認為比賽過程中能夠向韋綺姍老師偷師，學習到揀歌的重要性，並改善不少唱歌時的壞習慣，絕對是獲益良多。
比賽進入最後階段，二人承認對名次不再執著，涂家堯：「留下好作品緊要過名次，冠亞季得三個人之嘛，大家都會畀唔同原因淘汰。最重要係淘汰之前，你留低咩喺度呢？」做烘焙、甜品生意的Venus，用甜品來形容比賽，「我哋嚟到旅程一半，每人都好似特色甜品咁，芝士蛋糕、拿破侖、蘋果批等等，每人都有獨特個性，好難用名次去定義，可能當日整得特別好，拿破侖特別脆就得到冠軍。每個人每首歌都可以係代表作，例如佢唱嘅《祝君好》，我嘅《MERCY》，真係得到觀眾鍾意，將來有機會拍MV或者出單曲就當圓咗呢個夢。」
很多人認為「有錢先可以講追夢」，涂家堯、Venus不認為錯失「良機」，而是在最適當的時候遇上準備好的自己，前者說：「我都幾孤寒，唱歌唔使錢，我唔會將唱歌同錢掛勾，當然有人會自資出碟，但每個人際遇唔同，當刻冇成為歌手嘅機會，就自然要搵其他方法『搵食』，我夠想20年前揀唱歌呢條路啦，但20年前唔係你揀就可以發生。」Venus認為時間就是金錢，以往唱歌，她當作喘息空間或秘密花園，踏上舞台是需要花時間的，慶幸在生意、家庭都能夠兼顧下，勇敢追夢，「我諗過，若當年媽媽畀我入行，靠我一個人喺呢行打拼，真係會好容易迷失，唔知到今日自己會變成一個點樣嘅人。我明白機會喺眼前，一定要作出取捨，媽咪同我講過最大興趣未必係你求生工具，當你求生工具失去，你就會連最大興趣都冇埋。屋企人係醫學世家，當時講明，我一定唔可以入娛樂圈，驚我會嚚張、迷失。直至而家，培育我成為一個好好情商嘅人，接受到好、壞評論，呢樣係最昂貴...我花10年時間先擁有而家呢個心態，入嚟比賽見識到咁多高手，同咁多音樂人合作，只會有得冇失。」
U Lifestyle App自家節目登錄《U TV》專區！
↓↓試玩、試食、試用影片任您睇↓↓
【立即體驗】
撰文：楊安莉