靜態縮時攝影師Pelle Cass 個人展登陸海港城

黛安一直好佩服識影靚相嘅人，公關姊妹話，以獨特「靜態縮時攝影」聞名、美國著名攝影藝術家Pelle Cass，由即日起至本月26日，會喺海港城美術館舉辦首個亞洲個人展，展出共15幅大作，當中5幅為最新作品，包括為今次展覽製作嘅首幅香港作品「Choi Hung Estate Basketball」。

Pelle Cass擅長喺時間與空間之間製造出混亂感，會影過萬張相再合成一幅作品，但過程中唔會改任何像素，只係篩選佢想留低嘅內容，形成一張記錄一段時間經過嘅作品，每張相都好有特色，佢嘅作品獲最少4間藝術館收藏，足證實力非凡。

為咗影「Choi Hung Estate Basketball」，佢同團隊花2日去彩虹邨籃球場影咗逾2.38萬張相，再花超過2星期選出1,203張相做後期製作，成品不但捕捉到市民打籃球嘅景象，仲睇到居民散步、晾衫等，亂中有序，令人拍案叫絕，1張相就可展示到香港城市嘅生活日常。