迪士尼製作女總監 家庭事業兼得 樂園特備節目慶3.8

黛安一直覺得雙職婦女唔易做，好似香港迪士尼樂園度假區製作總監虞楟（Fiona）咁，要兼顧工作亦要照顧兩個孩子，但佢仍積極帶領團隊不斷尋求創新。Fiona已喺迪士尼工作逾17年，現時負責領導樂園演出嘅製作團隊，廣受歡迎嘅城堡夜間滙演「迪士尼星夢光影之旅」，都係由佢領導團隊由籌劃到公演做好準備，佢亦要同美國團隊緊密合作，所以表演質素備受讚賞。

雖然工作忙，但Fiona都會爭取時間陪家人，例如帶仔女到樂園欣賞佢有份製作嘅表演，小朋友亦因為媽媽嘅工作而感到驕傲，呢個亦係Fiona工作嘅動力。身為母親，佢亦會特別體諒同事處境，明白大家需平衡工作與生活，有更多時間陪家人。

另外，為慶祝「國際婦女節」，樂園喺今日（8日）嘅「米奇與好友大街狂歡派對」亦會有特別版本，香港迪士尼仲特別請咗約100名來自香港聖公會東涌綜合服務嘅婦女團體和家庭到場欣賞。此外，樂園內更有多個Marvel女英雄喺明日世界舞台同大家見面㗎！