香港病人組織聯盟主席袁少林先生經常頭暈，24小時被頭、頸痛楚纏擾，手腳也不靈活，跟遇上工業意外前的他相比，其聽力、語言能力、吞嚥能力大不如前，更一度失去個人尊嚴。
「我以前從事建築業，日曬雨淋風吹雨打乜都齊，用體力謀生但生活滿足、性格樂觀。我出事前熱愛睇書、寫吓嘢、遊船河、釣魚、行山，但手術後乜都做唔到。」
一次意外改變生活
1994年，41歲的袁少林不慎從工地一個十呎高的閣樓倒下，倒樹蔥頭著地立即失去知覺。正值壯年，他對昏迷了多少天完全沒概念，只知道清醒後的自己已回不到從前：「手術後我思想混亂，加上腦部受損有幻覺，胡言亂語又刀又劍，細佬妹好擔心我，驚我失智第日要瞓天橋底執垃圾食。」這次意外，導致他的腦室、腦幹及小腦嚴重受傷，手腳活動能力亦大受影響，後遺症包括全天候每分每秒的暈、痛和嘔，從此改變下半生。
「物理治療幫到你嗎？」我問。
「完全做唔到物理治療！」袁主席回答，「一坐起身、一郁個頭就會暈同嘔，係噴射式咁嘔，就連食嘢同飲杯水都嘔，所以曾經瘦至90幾磅。」他的復康路荊棘滿途。
1994年這一跌，徹底改變了袁主席的生活和心態，「未有事之前嘅我好健康，冇乜點病，當時我嘅目標好『個人』，謀生囉、工餘個人享受去滿足興趣咁囉！其實呢29年嚟 (受傷後) 我都冇乜病，我嘅問題屬於創傷性，而唔係原發性。」
「出院後我行動不便，加上住唐九樓，上落樓都要細佬孭我，故此好少機會出街。後來嘔嘅情況穩定咗，我唔想一世靠人，最好嘅解決方法係自強，所以試過扶住樓梯偷偷落街買飯、買報紙。燒味店師傅見我企唔穩，就叫我搵人幫，唔好自己出街，但我唔鍾意解釋，我知道聽到嘅都會係啲例牌『振作啲』、『積極啲』、『接受、唔好諗咁多』嘅說話。後來我喺朋友介紹下加入咗慧進會，發現呢個病人組織好熱情，好有誠意，我覺得好溫暖。從此我每日都有動力出街，身體狀況亦好咗。我喺慧進會遇到好多『同路人』，有人情況比我差，但其實每個人嘅後遺症都唔同，好難比較。」
受傷後躺在醫院的他，最渴望做的事，是有人和他聊天；而出院後失去社交的他，最渴望做的事，就是落街看信箱，等待慧進會的活動郵件，「有嘅話我立即參加！我坐車去參加活動會暈，一落車就會嘔，去到目的地都仲未暈完，經歷刻骨銘心，我嘅『看不到的疾病』暈、痛、嘔真係苦不堪言。」
- {{hket:inline-image name="p33.jpeg"}}{{/hket:inline-image}}
- {{hket:inline-image name="0001-39_20230111020331.JPG"}}{{/hket:inline-image}}
- {{hket:inline-image name="0001-13_20230111000725.JPG"}}{{/hket:inline-image}}
- {{hket:inline-image name="yuen2.JPG"}}{{/hket:inline-image}}
- {{hket:inline-image name="0001-29_20230111015744.JPG"}}{{/hket:inline-image}}
傷後積極活出第二人生
慧進會由一班腦部受損者、其家屬及義工於1993年組成，這個中風及腦部受損病人自助組織的成員守望相助，共濟共勉，成為了他傷後積極踏出的第一大步。他擁有無人能破的光榮紀錄，就是28年來，從沒缺席過慧進會任何大小活動，加上積極樂觀的性格，先被邀請擔任執委，最後於1998年當選成為主席。
袁主席曾經問自己：「其實我受傷之後係咪乜都做唔到呢？」答案當然不是。過去10年，他的另一個身分，就是香港病人組織聯盟主席。這是一個和醫管局及香港政府溝通無間、香港最大的病人組織，由47個不同長期病患自助組織會員團體所組成，會員人數已過4萬，當中涵蓋了腦科、精神科、眼科、心臟科、呼吸系統科、風濕科、血液科、泌尿科、肢體傷殘、癌症…等患者。
「以前病人或病人組織想約見政府、約見醫院管理局比較難，呢個係事實，而且彼此關係敵對，只有批評同抗議聲。我唔係唔批評，而係選擇大力推動醫院管理局對病人嘅凝聚及溝通，去舉辦訓練活動，慢慢委任病人領袖建立聯網等，我哋現在同醫管局有商有量，溝通密切，我覺得如果聚焦同目標都喺城牆之外，就算打鑼打鼓吶喊，遠遠唔及對方打開城門請你入會議室，畀張議程你、畀個議席你。由前香港食物及衞生局局長高永文醫生開始，但凡有醫療新政策，都會邀請我哋去政府總部開會，去發表意見，每年高峰會都見到行政長官、財政司司長、政務司司長，令我哋有更大空間去為病人爭取權益。」
盼提升病人組織認受性
袁主席是一位戰士，70歲的他每天跟後遺症戰鬥，同時為病患者爭取更好的醫療條件。對於未來，他有一個心願，就是提升病人組織的認受性和社會地位，因為壯大了才會好辦事，「『檢討』呢兩個字、呢個機制，我覺得放諸四海皆準，尤其是病人組織，我哋習慣做完一件事會立即檢討，前事不忘後事之師。另外，現在大數據年代，一定要與時並進，各類疾病嘅數據好重要，好有參考價值。」對於當年的工業意外，他經常安慰自己，「我(喺地盤) 捱到五勞七傷，現在做到嘅嘢竟然比以前多。以前唔識電腦，出事後有個會友送咗張倉頡字碼表畀我，我自己練，現在打得好熟。以前支筆用嚟寫六合彩、寫報價單，原來現在有咁多用途，用於正途可救人同埋鼓舞人。我有一個座右銘，就係『積極砥礪我自昂首闊步，復康路上無視荊棘滿途』，呢兩句任何病人都合用。」
他勸勉各位《晴報》讀者要管理好身體，眼見普遍香港人重治療、輕預防，只抱著有事去看醫生的心態，不重視良好飲食習慣，繼續吸煙飲酒，希望大家無病都要做好自我管理，不要掉以輕心。
U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】
撰文：陳小芝
編輯：陳潔雯
攝影：陳健珊
鳴謝：Trattoria Piccolo (西環加多近街39&41號地下B號舖)