人氣男子組合MIRROR踏出香港，首推出英文單曲《RUMOURS》，MV特別揀選了舊式理髮店、天際100及香港大球場作作拍攝場地，挾香港特色正式進軍海外，MIRROR眾人亦有不同的感想與期望。隊長楊樂文（Lokman）說：「好簡單，追女仔，用Rumours一字，就係想問你，有冇聽過關於我對你嘅謠言，我有少少鍾意你，成日幻想住你，好簡單直接嘅內容。」
同場加映：李駿傑 Jeremy@MIRROR想同甜美笑容女仔「Closer」 中學時代佛系曖昧食白果
MIRROR受訪姜濤狂打七次喊露 精神萎靡姜糖擔心休息不足【下一頁】
副隊長江𤒹生（AK）表示今次為隆重其事，特別找來國際級人馬製作，AK介紹道：「搵咗曾與BTS合作的音樂人作曲，監製Edward Chan揀呢首Demo係好有型，同我哋之前嘅曲風有少少唔似，內容上亦係第一次講兩性關係嘅Topic，作為第一隻英文歌，係幾新鮮。」
對於首次灌錄英文歌，眾成員各有感想，其中Lokman道：「係幾好玩，錄音時有一個Vocal Coach（聲樂教練） Andrew不斷幫我哋執口音，佢好正能量，不停鼓勵我哋，我哋每唱完一句，都會讚到我哋天上有地下無，令到我哋唱嘅時候都好有自信。」AK亦說：「Andrew執咗好多咬字、發音，點樣去Fullfil呢首歌，令到今次唱歌技巧有新突破。」
Jeremy李駿傑坦言有點緊張，他說：「第一次錄英文歌好緊張，因為要錄英文咬字，喺Andrew教導下係好啲嘅，希望我哋唔會失禮大家啦！」姜濤特別發現每位成員唱英文的聲線跟唱廣東歌不一樣，「聲底會有唔同，我個人好鍾意Ian唱英文歌時把聲，比較自然。」Anson Lo則開心道：「出道以嚟都未試過錄咁多英文字，好好玩！成個錄音過程好新穎，因為過去只有Edward監，今次加上Andrew，成個Vibe認真得嚟加咗一點搞笑，因為每錄一句，Andrew都會讚你一句，佢係錄開國際音樂嘅人，俾佢讚我英文好，令我好自豪。」而Jer亦感激Andrew的幫忙，他說：「佢喺美國有時差，每次都係凌晨4、5點起身幫我哋，好似未瞓醒咁，呢個係有啲好笑，但好開心可以同到佢合作。」
MIRROR合體拍電影齊登大銀幕 《12怪盜》宣傳照曝光 鏡粉超期待【下一頁】
雖然《RUMOURS》是一首情歌，但MV裡12子周旋於女主角譚旻萱（Mandy）之間，完成不可能任務。邱傲然（Tiger）說：「我哋去咗彩虹邨一個好舊嘅理髮店，好啱拍攝用，加埋啲燈同煙，所有嘢都好有味道。」呂爵安（Edan）笑言：「好有香港風格，好有舊色感覺，喺嗰度主要拍一啲劇情，講述我要看住Mandy，但佢突然唔見咗，然後就有接續嘅劇情發生。另外當中有一幕係望住Lokman同Alton夾住Mandy入嚟，但大家都忍唔住笑，因為Mandy太高了！」
除了理髮店，另一拍攝地點sky 100，也令MV多添幾分香港味道，邱士縉（Stanley）說：「因為會有好多外國人睇到我哋嘅MV，所以揀嘅拍攝地方都有好多香港特色，其中sky 100係香港最高大廈，可以睇到香港最多嘅風景，而香港嘅夜景係最靚嘅。」因為〈RUMOURS〉，MIRROR終於聚在一起跳唱，陳卓賢（Ian）開心道：「好耐冇一齊跳舞，一齊唱歌，大家各有各忙，所以可以聚埋一齊跳舞，係好值得開心。」
對於推出英文歌進軍海外，各人都有不同感想與期望，盧瀚霆（Anson Lo）表示：「好期待但亦好緊張，要達到國際性Level同Standard係好難，所以唔敢奢望或期待太多嘢，但盡力做到最好啦！」Jeremy最期望的是：「希望可以從香港可以踏上韓國嘅舞台。」Alton就一貫搞笑語調，說：「希望可以有多啲人認識我哋啦！希望可以借住呢個機會同公司申請，睇下可唔可以搭飛機去外國做嘢嘅機會。」姜濤則長遠地想：「首先希望可以有香港觀眾嘅認可，海外觀眾係好長遠嘅事，等大家基礎好啲先再諗，而家唔諗太多。」Edan亦道：「其實我又冇諗我哋要進軍海外喇，我哋冇乜呢個諗法，主要希望有呢首英文歌，可以有多一個機會俾出面其他聽眾會了解到MIRROR。」Stanley則平常心面對：「其實冇話分邊個語言，當我哋又出多首歌囉，我哋冇話要進軍海外，然後有好大壓力，我哋只係想做好作品，又未試過英文歌，咪試下，可能下次試下普通話歌都唔定，只係多一個唔同語言嘅作品，唔理任何語言，呢首歌係真係好聽，咁多首團歌之中，我係幾鍾意《RUMOURS》，排第一，希望我哋鍾意嘅同時，大家又鍾意啦！」
撰文：娛樂組