陳淑蘭
陳淑蘭

春天要防霉防蚊

發佈時間: 2023/03/23

春天要防霉防蚊

而家香港嘅天氣唔似以前咁四季分明,今年3月份好似比上年凍咗,帶少件衫,真係分分鐘冷病。

而家濕度仲未算太濕,但2月跑渣打馬拉松嗰日嘅濕度幾乎去到100%,參賽者比賽時呼吸應該好唔順,辛苦晒,但之後有幾日又乾燥到只得25%,我覺得應該用更年期女人嘅心情嚟形容變化不定嘅天氣,分分鐘可以爆發危機!

地球暖化,天氣變得更加不尋常,如果要講呢個議題,真係有排講。不過,香港真係一個福地,天氣就算點變化都有個譜。我而家去旅行,盡量都睇住當地天氣嘅變化,好似我呢啲井底蛙,如果遇到某啲國家去到突然變得好凍或好熱,我絕對頂唔住!

一年之計在於春,但四季中我最唔鍾意春天,雖然應該係花香處處,但我已經開始聞到潮濕帶嚟嘅噏味處處,屋企嘅衣櫃更加要放多兩個吸濕劑,抽濕機盡開,保住啲物件唔發霉……而家我仲會不停買一啲防霉劑周圍噴。

另一樣我唔like春天嘅,係有好多細蚊滋仔!雖然你睇佢唔到,但當你知道佢嘅存在時,佢已經咬到你痕到跳舞,電蚊拍都電唔死佢,因為細到睇佢唔到,呢樣最令我激氣!我知道用檸檬草香氛必定可以滅絕佢,但最令我含恨嘅係,屋企嘅工人姐姐一聞到檸檬草精油香氛就會頭痛兼頭暈,即係唔用得,惟有搵滅蟲公司嚟滅蟲同放多啲捕蚊燈啦!

一年之計在於春,對我嚟講嘅「計」,就係要不停咁試下有乜嘢最好方法或產品可以除霉、除蚊!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭