郭曉陽
郭曉陽

投資黃金避險 有多種方式

發佈時間: 2023/03/23

投資黃金避險 有多種方式

上星期講到Mable問黃金喺呢段時間買唔買得過,老實講,避險情緒一定有,但黃金價格唔似股票,不會似坐火箭咁升,除非買嘅數量多,否則只屬於保本策略。

如想投資黃金,有何選擇?離唔開以下5項。

第一,實體黃金。最直接莫過於去金舖入手,既能夠感受到實物重量,又可自行選擇要金粒抑或飾金。但實金不便於保存,又必須去金舖才能交易;如果買飾金,日後賣出又可能蝕手工費。

第二係黃金ETF,買賣方式同普通股票交易一樣,優點係價格透明且流通性高,但畢竟同股票相類似,所以有價格波動嘅風險。

第三種係貴金屬股,港股市場有唔少選擇,但其實此舉並非直接投資黃金,而是投資黃金相關嘅公司,由於屬於股市買賣,所以優劣同黃金ETF相類似。

此外,仲可以選擇黃金存摺或者紙黃金,投資者只需要喺銀行開立黃金存摺後,就可買賣黃金,過程中唔涉及實貨儲存同交收,一般銀行都有此服務,而最大好處係入場門檻較低。不過,一旦相關投資機構倒閉,投資者或會面臨損失,需要留意。

最後一種係黃金期貨,但由於期貨屬高風險槓桿式投資,而且入場門檻高,曉陽在此不作解釋。

介紹完後,Mable就問邊一種最適合自己。曉陽覺得,如果想穩穩陣陣避險保值,買實金或者紙黃金其實係好選擇;如果有一定投資經驗,又想博價格波幅,黃金ETF同貴金屬股都可以考慮。但黃金期貨就不適合普通投資者,所以基本不需參考。曉陽最後都要補充多一句,黃金價格受多重因素影響,所以投資者應該避免以炒作心態投資。

(本欄逢周四刊登)

撰文: 郭曉陽 財務未自由,仍繼續打工,齊齊學理財,講錢為致富
欄名: 講錢•智富