郭曉陽
郭曉陽

阿里能否續升 有待觀察

發佈時間: 2023/03/30

阿里能否續升 有待觀察

呢兩日熱門話題,當然係阿里巴巴(09988)宣布分拆6大業務,一講開呢個話題,公司唔少同事即刻參與其中,原來有貨喺手而且坐艇嘅大有人在。

工程部Dicky問曉陽,阿里仲有無得升?尋日股價升超過12%,可惜未能企穩50天綫(96.52元),如果今日能企穩50天綫收市,後續仲係有機會挑戰100蚊大關,否則可能都係上落格局。

至於長遠係咪值得吸納,曉陽就問Dicky,你買阿里係因為分拆業務,定覺得佢長遠可以復甦?

分析之前,首先了解一下阿里分拆成點。阿里最新嘅體制改革稱為「1+6+N」,即阿里集團之下,設立阿里雲智能、淘寶天貓商業、本地生活、菜鳥、國際數字商業同大文娛等6大業務。

但細心睇,除咗阿里雲智能同淘寶天貓商業之外,其他業務其實仍處於虧損狀態,所以短期刺激純粹係憧憬未來業務成長同獨立上市。

第二樣需要留心嘅係,集團CEO張勇表示,集團分拆獨立業務,係要接受市場檢驗。當市場仔細梳理之後,會唔會對個別業務有更高要求?屆時可能會拖累集團股價。

當然,市場暫時嘅評價趨向正面,例如大摩就話,業務重組會係股價一大動力,喺美股市場有機會升超過一倍;其他大行亦相對睇好。

不過,睇好還睇好,大家要記住,市場好現實,即使分拆可以釋放潛力,但唔賺錢始終就係唔賺錢,要扭虧為盈,都係要市場需求配合。股價仲有無下文,呢幾日如果再有消息就見真章。

(本欄逢周四刊登)

撰文: 郭曉陽 財務未自由,仍繼續打工,齊齊學理財,講錢為致富
欄名: 講錢•智富