為「退粉潮」感不開心 呂爵安預告MIRROR拍真人騷

男團MIRROR最近被指人氣下滑，皆因不少韓團在通關後相繼來港開騷，令鏡仔大受威脅。呂爵安（Edan）前晚出席電影首映禮，坦言少了粉絲支持會感到不開心，但會努力做好本份，又透露MIRROR正計劃拍攝新一輯真人騷。

呂爵安前晚與毛舜筠及鄭中基等出席電影《死屍死時四十四》首映，吸引大批「爵屎（Edan粉絲）」迫爆商場。提到近日不少韓團及各地歌手來港演出，令MIRROR大受威脅，Edan說︰「大家多咗選擇，即係話畀我哋知要更加努力。BLACKPINK、周興哲演唱會我都想睇，大家睇到唔同演出係好事，人哋好犀利，自己都要做好啲。」

有指MIRROR出現「退粉潮」，Edan表示是個人選擇︰「如果時間耐咗，佢哋可能無咁鍾意，情感嘅嘢控制唔到。如果粉絲覺得我哋未夠努力、唔夠叻，我哋再努力啲。如果見到粉絲『退粉』，的確有啲唔開心，惟有做好啲，希望遲啲再鍾意番我。（爵屎少咗？）間中都見到有人話唔追喇，但唔知人數。」有指因鏡仔經常未能齊人，影響受歡迎程度，他說︰「12個一齊係少啲，大家都各自有工作，MIRROR計劃緊拍團體綜藝節目，類似真人騷。」

鏡仔5月開粉絲見面會

另外，MIRROR官方歌迷會昨日宣布，將於5月27日假啟德郵輪碼頭舉行三場粉絲見面會，共招待3,600位鏡粉，票價480元。不過，有鏡粉表示早已繳付會費，但仍要抽飛及花錢購票；亦有人投訴名額太少，而且每場見面會僅歷時一小時亦太短。此外，無綫節目《成人教科書》最新一集中，年僅11歲的蔡同學接受大改造，他希望扮靚後似鏡仔盧瀚霆（Anson Lo），誰知竟變得與Edan撞樣，連Edan亦轉發友台片段，笑說︰「想變Anson Lo，點知變咗Edan！」

採訪︰Pauline

美術︰梁政敏