晴報VIP︱「偉哥之母」 陳羽微 銅鑼灣街頭尋回人生 肥媽媽變毅行者「上天只畀能駕馭嘅經歷你！」

擁有註冊藥劑師資格的暉致醫療管理有限公司香港區總經理陳羽微 （Anita），年少時在美國求學，大學時期已於當地醫院及藥房實習，畢業後決定穿起白袍，在芝加哥24小時大型連鎖藥房當藥劑師。

{{hket:inline-image name="quote-06.jpg"}}{{/hket:inline-image}}

{{hket:inline-image name="IMG_1101_20221208124255.jpg"}}{{/hket:inline-image}}

「工作每日都好類似，但病人嘅問題個個唔同。」作為前線， Anita很在乎病人吃對了藥沒有、吃足了份量沒有、健康有否得到改善，但…「去到第3第4年，工作開始變得重複，適逢上司升我做管理，其實工作都好簡單嘅，處理一啲基礎運作呀、領導一兩位配藥員呀、負責少許生意往來例如入貨出貨咁，正因為呢個機會，我發現自己對管理同生意好感興趣。」沒多久，表現卓越的她獲內部調升，接著遷居往美國西岸，由藥房經理變成好幾個洲分藥房的管理層。

「新嘅工作模式下，我要逢星期一飛去唔同洲分，到咗星期四晚先至飛返屋企，當時一對仔女仲細，只能夠靠中國人保母照顧。喺美國生活，有屋住、有車揸係基本嘢，但我發覺家人之間嘅疏離感好重，我好想搵番個連繫點，想大家好好溝通。2007年我放假返嚟香港，企喺銅鑼灣街頭，嗰一種熙來攘往嘅感覺好正，喺美國條街冇人到一個點，令我好迷失，到底我為咗份工定係為滿足感呢？我都唔知自己為乜。」Anita決定舉家回流，為此，她努力準備考試，成功獲取香港的註冊藥劑師專業認可。

2009年回流歸來，其求職路並不顛簸。她從報紙得知有非牟利機構正在聘請藥劑師，「我一睇，呢個機構好有理念，佢哋會開設全港第一個非牟利社區藥房，推廣『藥物教育』，幫助市民正確食藥，加上香港有人會因為冇錢而冇藥食，其實大家嘅生活質素都可以好啲，所以我好開心接受呢個Offer，然後從牌照、選址、藥物…等等由零開始去為藥房部署。」

由前線到管理層 樂於迎接新挑戰

Anita回港後工作順利開個好頭，在非牟利機構一做便做了五年，為何最後會選擇離開？「正因為呢個環境，令我認識咗好多（藥）業界嘅朋友，我一位『伯樂』梁先生，2013年畀機會我轉投商營機構，去到一間美國大藥廠嘅醫藥學術部工作，我負責確保對外嘅資訊不偏不倚，包括推出廣告時，資料要合情合理、有數據有實證支持。當時Marketing主管位置懸空咗兩年，一直未搵到合適人選，老闆問我有冇興趣試下，對於做開前線藥劑師嘅我當時吓咗一聲，但老闆話我喺美國時睇開損益、睇埋廣告，咪就係Marketing囉，加上佢需要嘅係一個Leader，唔係一個Worker：『你去帶住下屬做Marketing，要知道佢哋做乜，唔係叫你自己做。』於是我就接受咗呢項任命。」

人到中年，不少人因照顧家人、個人情緒、薪酬合理度、工時長短等條件考量下，不敢或不願去接受新的工作模式。Anita向來對於新挑戰抱著正面態度：「我心口一向都有個勇字，喜歡挑戰自己。我覺得信任好重要，我相信人之初性本善，冇人會立心害人，既然有機會去學新嘢，點解唔接受呢！」

談到信任，她深信無論在美國、香港甚至世界任何一個地方打工，人與人的交往只要自己先行出第一步，都會得到正面的結果。結果是，她以總經理的身分，離開大藥廠再去接受下一項新挑戰，「我現在呢一個醫療管理公司團隊，係由先前嗰個藥廠分拆出部分產品、同事，再加入另一間同時分拆嘅藥廠合併而組成，係一間喺美國上市嘅新公司。我哋嘅團隊同產品看似一樣，但過去幾年大環境轉變，點樣喺新架構、新文化之下再創高峰，令業績提升等大家有人工加就係考驗。」

Anita和她的團隊帶到過去新環境的眾多藥品當中，有包括香港人很熟悉的膽固清、健壓樂、痛博士、利痛抑、維固力以及「偉哥」威而鋼。這六大藥品界明星，覆蓋了心腦血管、精神健康、痛症管理、關節保健和男士健康等多個醫療領域，「我哋聚焦於非傳染性疾病（NCD），亦都係今天世衛及香港衞生署好重視嘅範疇。如果我哋拿捏得好，係可以減低入院及後遺症嘅機會，喺疾病未變成重症之前，預防方面做好管理嘅話，我哋嘅生活質素係可以得到改善。」

盼令市民了解正確醫療資訊

筆者本人甚或身邊的家人朋友，種種原因之下，皆被不同程度的痛症困擾著。對此，Anita有以下觀點：「痛症有好多層次，有『實在嘅』受傷痛、關節磨損等；困擾緊全世界嘅，有講唔出咁痛，而又唔容易搵到原因嘅，佢叫纖維化痛症（Fibromyalgia）。佢係一種好慘好慘嘅痛，但又照唔出嚟，人哋以為你傻嘅。所以要返番去Disease Awareness，我哋要畀大眾知道有問題或徵狀時，要正面去處理佢，要去分辨坊間正確嘅資訊。喺醫療體系裡面，無論公營定私家，都有一個責任、有一個使命去令廣大市民獲得正確嘅醫療資訊。」

問Anita對痛症的看法，皆因本人正經歷「結構性冇事，但功能出問題」的神秘痛楚所困擾。這些找不到出處的痛楚，多多少少也拉低了個人情緒，分分鐘影響精神健康。我亦留意到Anita和她的團隊，近年很重視精神健康這領域，她舉出一個很貼地的例子：「疾病同情緒健康環環相扣，例如男士健康咁，不舉個案，病者同伴侶關係會有負面影響，有例子個伴侶起疑心以為對方去滾，連帶婚姻都出現問題，家庭、工作、自信都大受影響。」

我問：「大膽稱呼你做『偉哥之母』，你點睇 威而鋼呢隻藥？」

她說：「點樣去形容『偉哥』呢？佢並非關乎一個人嘅生與死，但影響之深遠，絕對唔會比任何一種頑疾少。令到一位男士喺應該發揮時發揮得好，佢嘅自信心、精神及體能健康、同伴侶嘅關係等等，就會一系列得到改善。唔好講『偉哥』或其他精神科產品吖，一般市民覺得可以唔食藥就唔食藥，反而自行去買坊間一啲冇數據、冇實證嘅Treatments，何不去選擇一啲已經研發咗幾十年，有科研實證、可以預估到副作用嘅藥品去改善健康呢！所以要教育市民點樣去面對處方藥物，仲有營養補充劑應該乜嘢時候食，係咪一食藥就要食一世？你問我呢啲概念啱定錯，咁點解你又可以日日食煙、日日飲酒就唔覺得係問題呢！」

{{hket:inline-image name="IMG_1081_20221208114315.jpg"}}{{/hket:inline-image}}

分享工作態度 過程結果一樣重要

疫情打亂了我們的生活三年，過去三年，對於Anita和她的團隊每位成員，都是一個重大的考驗，「體驗到彈性同靈活性、敏捷度。由我哋每日返工，到完全Work From Home，再去到返番去公司，過程必須拿捏得宜，原來有人真係頂唔順日日在家工作，有個實際嘅問題，我哋需要好多Zoom Meeting嘅時候，細路又要上堂，父母又要開會，咁係咪每一個家庭都有足夠嘅頻寬？又係咪人人都有書房？香港人未必能夠裝備十足地在家工作。當時我哋盡量配合、唔開鏡頭、改用手機等，盡量簡化件事，同埋建立『唔會為開會而開會』文化。」

如果想加入Anita的團隊，成為醫療管理公司其中一員，是否要具備相關學歷及工作背景呢？「咁又未必！」她說：「喺香港，主要嘅跨國藥業公司主力做營銷部分；而喺我哋醫療管理公司，商業方面有前線銷售、市場推廣等，後勤辦公室就有醫療管理呀、註冊部、品質檢定等唔同部門。其實特別喺前線，係咪真係需要有醫療背景嘅人呢？未必一定。我反而相信同事嘅態度，學習心態、合作心態及處事靈活度更加重要。」

面對不同界別的領袖，我都會問：「你係咪一個只睇結果，唔睇過程嘅人？」

「絕對唔係！」這位『偉哥之母』秒回，「冇一個好嘅過程，又點會有一個好嘅結果呢。過程應具彈性，凡事都化繁為簡，並且要有清晰嘅目的。」

工作方面，Anita直言一直比她本人預期的好；而家庭方面，她是這樣去形容的，「未必係幾多耕耘就會得到幾多收穫，要有緣分嘅配合。上天只會畀一啲你能夠駕馭到嘅經歷你，今天嘅我好感恩。」回望難以駕馭的經歷，以及幾近駕馭不到的時刻，現在的她坦然自若說：「我身邊有好好嘅朋友，有好好嘅家人支持，令我睇清楚人生其實有好多唔同範疇。一個範疇做得冇咁好嘅時候，就喺另一個度發揮你嘅存在價值。」

堅持運動 改變自己心態

人生中，有家人和好友扶持固然重要，但懂得自愛也是個重點。婚後、產後的Anita，曾經是個肥媽媽，體重高峰時比現在重了30磅。她成功駕馭到體重，減掉30磅脂肪的過程相當特別：「2016年，我舊公司組咗個團隊去行毅行者，我呢啲梗係做啦啦隊撐同事啦！當時連埋我，合共有4位『師奶同事』做啦啦隊。眼見嗰啲真係去行嘅同事咁辛苦，我哋就話喇：『如果我哋4個去行，肯定仲震撼！』但100公里喎，點行呢？後來發現綠色力量環島行有25公里可選擇，同埋路線相對平坦，於是，我哋4個唔做運動嘅師奶，就膽粗粗去報名嘞，啲男同事好好，陪我哋去練，正常個半鐘嘅路程，我哋行咗足足3個幾鐘。我發現自己咁樣唔係好掂檔喎，所以的起心肝開始做運動，同時又發現原來自己食好多嘢喎，所以開始食少啲。一兩年之後，我嘅體重跌咗十幾磅，當我見到有成果，啲人又讚我瘦咗靚咗、再加上唔使成日著黑色衫，甜頭在前，我梗係堅持繼續做運動啦，直至現在。」外型的變化，令自信心大大增加，由渾身贅肉變成健康瀟洒，亦是對自己的一種負責，「做唔好自己，又點樣去管理他人呢！」

2016年的25K綠色力量環島行只是一個起點，今年就是一大個「彩蛋」。2月24、25日，Anita和同事，漂亮地以28小時的佳績，完成100公里毅行者。

Anita送給各位《晴報》讀者的Keep Fit錦囊：
1. 做自己喜歡的運動，持之以恆；
2. 均衡飲食、睡眠充足；
3. 樂觀、積極、開心。

{{hket:inline-image name="WALK.jpeg"}}{{/hket:inline-image}}

長子今年已經23歲，女兒下學期升上大學，還有「小兒子」貓貓Leslie，昔日的肥媽媽Anita，慢慢變成了今天擁有健康人生、指揮著醫療管理公司的領軍人物，每一步都踏實有序。她誠懇地勸勉大家：「年齡真係一個數字，心態最重要，心態絕對決定命運。點樣可以活得精彩，首先要有健康，包括精神健康及身體健康。送畀各位 — 活得精彩，過得自在！」

{{hket:inline-image name="IMG_1091_20221208120717.jpg"}}{{/hket:inline-image}}

U Lifestyle App睇盡《晴報》新聞資訊及自家節目
↓↓同步更新、更快更順↓↓
【免費下載】

撰文：陳小芝

編輯：陳潔雯

攝影：陳健珊

鳴謝：和昌飯店 (灣仔莊士敦道62號和昌大押1-2樓)

{{hket:inline-image name="11.jpeg"}}{{/hket:inline-image}}