黃嘉樂在劇集《法言人》中，顛覆以往木訥角色，飾演輕佻幽默的律師Will，為觀眾帶來新鮮感。嘉樂坦言從小到大個性內斂，直至遇上太太江惠賢後，才變得開朗風趣，但新婚不久的他收到太太投訴有「第三者」？此外，早前宣布離巢TVB的嘉樂，因一直「收收埋埋」，令《鐵馬尋橋》一眾兄弟姊妹十分擔心，嘉樂亦深感不好意思。
黃嘉樂在《法言人》中是男主角之一，飾演富二代兼「顏值擔當」律師Will，專業之餘性格幽默口花花，表現令不少觀眾另眼相看。嘉樂說：「阿Will同我嘅性格反差好大，本身我唔鍾意講嘢，比較木獨，拍攝過程唔單止好開心，我仲被角色感染咗，又被導演投訴喺片場多嘢講，咁多位演員聽到都話難以置信！」滿以為今次成功，令嘉樂坐穩男主角席位，但他偏偏決定跟TVB「分手」。「拍攝期間仲未開始諗合約問題，拍完《法言人》之後，我做咗一個重要嘅人生決定，就係娶咗我太太啦！經歷開心事之後，我突然有個想法，係咪應該嘗試下其他方向呢？咁啱見到上年約滿，經過充分了解之後，就決定完成合約離開。」
計劃重投內地發展
嘉樂坦言，在工作上仍有很多目標和想法，例如想拍古裝劇，但近年TVB古裝劇的製作比較少，所以他計劃重返內地發展，部分劇本和工作已在洽談當中。「其實你同我都估唔到，我十年前拍嘅內地古裝劇，依家喺內地小城市仲播緊，我將部分片段剪接畀監製睇，令佢哋重新留意我。我都諗過做內地劇男主角呀，我認為自己應付到，所以勇敢嘗試一下。」
其實，嘉樂早於十年前已到內地發展，但突然收到爸爸患癌的消息，即放下一切回港照顧家人。「爸爸患癌嘅時候，我嘅人生都改變咗唔少，當年喺內地個頭開得唔錯，但我係大仔，唔可以唔理屋企，所以決定返香港。我好感恩有好多人愛錫我，監製梁材遠二話不說就幫我引薦，同TVB簽經理人合約，畀我好好發展。我記得爸爸臨終前好確實咁同我講，要我好好堅持繼續演戲，我一定為咗佢努力實踐。每個人際遇唔同，有人行得快，有人行得慢，最重要係無行錯路，我對於依家得到嘅一切都好開心滿足。」縱使在香港多逗留十年，但他視為演技上的磨練，希望將來有所提升，成為獨當一面的男演員。
感激太太全力支持
今次離巢，嘉樂自認「衰仔」，皆因《鐵馬尋橋》的一眾兄弟姊妹事前全不知情。他說︰「我今次的確做得唔好，有少少隱瞞朋友，無同大家商量，所以佢哋一聽到我唔續約，反應特別緊張，尤其係唐詩詠同林子善，馬國明就一如平日作風比較淡然，詩詠叫我考慮清楚，而子善真係好緊張，不斷問我點解要走…其實我唔係刻意隱瞞，只係怕大家擔心我。」幸好，太太全力支持他在事業上的決定，更成為其背後的女人，為他打點工作安排。
新婚不足一年，嘉樂竟收到太太投訴指婚姻出現「第三者」，原來所謂「第三者」正是好友許家傑。嘉樂搞笑說︰「我同許家傑有種相逢恨晚嘅感覺，二揀一的話，我當然揀太太啦！你算吧啦，小三許家傑，我有老婆㗎喇！其實家傑帶畀我好多積極心態，有兄弟相挺、互相幫忙嘅感覺。我同佢基本上唔使返工，或者早收工，就會約埋去健身，久而久之太太有微言，覺得我成日約佢都唔約自己老婆，哈哈。」
【一按睇片】
服裝﹕Regent place unique
場地﹕PHENOMENON WINE•DINE
攝影︰陳健珊、何家賢
美術：梁政敏
撰文︰楊安莉
▲嘉樂與太太新婚不久，相處甜到漏。（IG圖片）
▲原來「介入」嘉樂婚姻的人，正是好兄弟家傑。（IG圖片）
▲嘉樂夫婦不時跟家傑三人行，家傑搞笑指嘉樂太太才是「第三者」。（IG截圖）
▲嘉樂（中）在《法言人》的生鬼演出十分搶鏡。
▲嘉樂對「鐵馬家族」隱瞞離巢一事，一度令兄弟姊妹甚為擔心。（IG圖片）
