小時候貪玩遇意外縫針 周吉佩直播自揭瘡疤

《中年好聲音》冠軍周吉佩（吉吉）日前在FB開直播舉行「答問大會」，並以歌會友回饋「吉S粉（周吉佩粉絲）」。素顏上陣的吉吉盡訴心中情，自爆最肥時高達163磅，又大方承認眼皮有傷疤，自揭受傷原因。

周吉佩奪冠後人氣急升，並火速製作新歌《你是我唯一的》。日前，吉吉抽空開直播與「吉S粉」互動。期間，吉吉自爆目前身高177cm，比年輕時矮了1cm。體重方面，他指參賽時重163磅，其後減至現時150磅，相信跟比賽壓力有關。他透露戒澱粉質及戒甜後，體重即下降，可謂萬試萬靈。

平日看來單眼皮的吉吉，在直播中展示自己的內雙眼皮，原來眼皮更有傷疤：「四歲嗰陣玩碰碰車無戴安全帶，點知撞埋去車頭，流血入醫院縫咗兩針，咁就一世，小朋友唔好學我咁，要乖乖戴安全帶。」有細心網友留意吉吉經常着穿窿牛仔褲，他笑言︰「我到底有無唔穿窿嘅牛仔褲？有嘅，一條囉。有次Bill哥（吳大強）笑我，難得有日條牛仔褲唔穿窿，點知輪到上面件衫穿窿，笑死！」問到有否興趣拍劇？吉吉表示︰「有興趣呀，但一定有少少驚，親熱戲？我諗唔會喇，問下老婆先。老婆我拍唔拍得親熱戲？」身旁的吉嫂竟回應︰「你咪拍囉，又唔係除褲。」吉吉補充說︰「未必得，有怨氣，如果同顏志恒拍親熱戲就OK。」

龍婷街頭表演日賺800元

另外，昨晚開慈善騷的龍婷接受車淑梅主持的港台節目《舊日的足跡》訪問，暢談17年由瀋陽來港追夢的經歷︰「我問爸爸拎咗10萬蚊嚟呢度生活，我最想搵到唱歌嘅工作，但我去酒樓同跳茶舞嘅地方，發現自己係最年輕嘅歌手。」龍婷在旺角西洋菜街表演時日賺約800元，但政府18年禁止表演人士在西洋菜街演出，她的街頭演唱生涯亦完結︰「可能係一個轉機，我被邀請參加中央電視台《星光大道》比賽，好唔容易得到總冠軍，之後參與央視春晚表演，點知第二日全國焦點都喺新冠疫情上，所有商演一下子取消晒。」

撰文︰Steven

美術︰梁政敏