廣州開騷吸2萬歌迷 楊千嬅綵排受傷變黐筋

楊千嬅前晚舉行《MY TREE OF LIVE》世界巡迴演唱會廣州站，相隔四年再於廣州開騷，千嬅聽到場內兩萬多觀眾的叫聲，即開心說︰「你（觀眾）好犀利喎，咁樣嗌落嚟，好耐無聽過呢啲聲音，多謝你哋呀！你嗌到咁淒厲，好似我爭你四年錢咁，哈哈，不過我好鐘意呢啲聲音呀！」

千嬅又以自己姓氏開玩笑，她指着歌迷拉的橫額說︰「見到你哋『咩羊陪住你』呀，依家見到個羊（陽）字都驚呀，知唔知呀？哈哈，作為一個楊姓女明星，好驚㗎，但見到你們就唔驚。」她自爆曾中招，笑稱記憶力愈來愈差，「我已經係有啲年輪嘅人，記憶力係會差啲。」她又透露開騷前受傷，「綵排時唔小心扭親隻手，點解整親呢？我要試舞台服裝，除褲時好緊張，因為趕時間，點知一除隻手指公就kick到隻襪，然後成條筋黐埋，手指公屈曲唔到。然後工作人員介紹一支藥膏畀我，搽咗好好多，可以成晚拎住支咪！」