安排仔女暑假活動 勿盲目跟風

就快到暑假，唔少同事都計劃緊旅行安排，部分有小朋友嘅同事就最頭痛，因為既要安排一家大細嘅旅行，又要準備仔女嘅興趣班，夾放假檔期成為大家最近午飯時間最緊要嘅活動。

曉陽尋日lunch time偶遇市場部Fanny同June，佢哋都有仔女，分別7歲同8歲，最近就煩緊去邊度旅行，同埋點安排興趣班。

唔講唔知道，原來而家讀興趣班已經成為小朋友暑假指定活動，Fanny就話佢已經幫個仔報咗4個興趣班，希望佢可以好好利用暑假學多啲技能；June都唔執輸，幫個女報咗3個，加埋平日都有學琴，其實一樣咁忙。

曉陽就諗起，最近有財務機構做咗個調查，兩成家長為子女報讀至少3個興趣班，其中編程同機器人或科技類（57%）及投資理財類（38%）嘅興趣班就大受家長歡迎。

報興趣班原來價錢不菲，以AI編程為例，如果係2至4人小班形式教學，每堂盛惠350元，一個課程一般係10堂，如果報足10堂，剛剛好暑假一個星期一堂，就需要3,500蚊。如果報3款唔同嘅課程，拉上補下，成個暑假單係興趣班開支就分分鐘要大約1萬蚊。到底值唔值得？曉陽未做人家長，所以無辦法評價。不過面對開支，大家應該審視一下自己嘅收入，唔好人報你又報，最終只會搞到自己生活壓力好大。

舉個例，唔少父母見到朋友為仔女報繪畫班，都會想報埋一份。不過，報之前首先要問下，如果收費高昂，自己係咪承受到？如果想培養仔女嘅藝術細胞，係咪只係得繪畫班一個途徑？定係可以同佢去下美術館、藝術館，甚至一個文化活動，等仔女吸收唔同嘅藝術創作靈感？

當然，為仔女將來打算，絕對係每個父母都希望做到嘅事，但培養仔女方法有好多，用錢買體驗，只係其中一種，做之前最好量力而為。

（本欄逢周四刊登）