放棄英國生活留港唱歌 38歲羅啟豪期待愛情來臨

《中年好聲音》季軍羅啟豪（Ramon）形容比賽令人生180度轉變，怕醜內斂的他因着對唱歌的熱愛，爆發儲足38年的勇氣在舞台上爭勝，由「隱形人」到後來獲得粉絲「豪殼」的支持，令他甘願放下英國的一切，正式踏上歌手之路。過往的Ramon缺乏自信，遇到心儀對象都不敢主動認識和表白，近年開始敞開心扉，期待遇到合適的另一半。

羅啟豪自小喜歡唱歌和音樂，但總是不敢踏前一步，「父母成日叫我喺啲阿姨、叔叔面前唱歌，但我太怕醜，匿埋喺飯枱下面，好想唱但又唔敢，仲驚到個胃乸住唔舒服。」他直言全身濕疹令他缺乏自信，甚至影響社交生活，「濕疹簡直困擾我成個人生，細個好嚴重，全身都會出水發炎含膿，依家仲有濕疹，大家都唔難發現我條頸比較紅，過去大半人生因為咁樣而錯過好多機會，好彩我依家心理質素尚算唔錯。」

Ramon憶起《中年好聲音》海選時，壓力大得雙手和說話都不斷顫抖，就算不斷成功晉級，但總是不被留意，「我覺得自己係隱形人，係有少少不忿，參加得比賽梗係想被人睇到，但我實在太靜，又唔會搶鏡博見報，只係默默唱好自己嘅歌。」直至團戰遇上參賽者陳早怡，成為比賽後第一個知心友，「佢一見到我就捧住我塊面，可能覺得我好得意啦，後來先知佢同我家姐有共同朋友，佢好錫我，成日會開解我，係我一個好好嘅傾訴對象。」而陳早怡亦成為Ramon跟其他參賽者熟絡的橋樑，令他漸漸跟大夥兒都成為朋友。

Ramon因性格關係錯過好多機會，感情生活亦然，「我太怕醜，真係認識唔到另一半，點算？咪咁囉！我當然都想有另一半，但係隨緣啦，細個都有傾慕對象，但唔敢做主動，成日等人哋做主動。不過，近幾年我都放膽咗少少會做主動，但都未識到一個可以拍拖嘅對象。」年屆38歲的Ramon坦言不敢期待婚姻，但不會放棄追尋伴侶的希望。

患嚴重濕疹影響社交

13歲開始先後到英國和美國讀書的Ramon，本來在英國任職平面設計師，但比賽後已跟無綫簽約成為歌手，決心在港重新啟步。「我實在太鍾意唱歌，唔想錯過呢次機會，我願意為歌唱事業放手一搏。其實中年去到人生一半都可以追夢，我就係一個好見證，唔講得上係好成功，但因為我肯踏出呢一大步參加比賽，完全180度改變咗我嘅人生，用咗38年時間先做到呢件事，我做到啦，我無悔！」他透露現時最大的目標，是能擁有自己的歌曲及出碟，還想與李佳合唱，「之前同佢合唱過《當愛已成往事》，非常享受，期待可以再同佢合唱情歌。」

【一按睇片】

撰文︰楊安莉

攝影：何家賢、陳健珊

美術：悠然