ERROR成員郭嘉駿（193）和白只今日到尖沙咀出席舞台劇《Laugh Vacation》記者會，首次演出舞台劇的193自封「處男」，笑言未試過，所以又驚又期待；而舞台劇演出經驗豐富的白只，則貼心向193傳授昔日「破處」經歷，形容當時「濕濕地、黑黑地」，十分搞笑。
同場加映：陳慧琳爆兒子最愛看周星馳電影 自薦飾演《少林女足》退休教練
193、白只、韋羅莎、朱栢謙、吳海昕、楊偉倫（阿卵）及胡麗英今日齊現身記者會，阿卵在台上分享時，笑指希望做完這套舞台劇後，可以有193一樣高，而站在阿卵和193中間的白只，則望住兩人表示：「咁我要搵脊醫。」事後193、白只及韋羅莎一同接受訪問，首次演出舞台劇的193，表示跟所有人都第一次合作，故感到新鮮，但同時有點膽怯，他笑說：「我都有啲小學雞嘅期待同驚，今日靜咗好多，因為我角色係演員，所以要投入少少，唔可以太搞笑，要控制好自己，驚太綜藝會唔小心講咗粗口。」
不過現場所見，193明顯「硬晒軚」，他卻死撐：「我個角色就係一個好木獨嘅演員，淨係今日，今日正能量咪正直囉，舞台劇就主要做番自己平時搞笑個樣。（今日變返「處男」？）係呀，好耐無試過做『處男』，都幾廿年喇，終於都可以試番呢個滋味，同各位前輩偷師，佢哋舞台劇同演戲經驗多過我幾十倍。」問白只有甚麼「破處」經驗跟193分享？他抵死表示：「濕濕地㗎，又黑黑哋，好多人捉住我。（多人運動？）梗係多人啦，前後台咁多人，我唔知咩事就畀人推咗出去，然之後就無咗，但喺學校係安全好多嘅，大家都係第一次嘛，又有老師睇住。」
後來白只再一臉認真以前輩身份作教誨：「我唔覺得佢（193）係『處男』囉，可能佢驚完opening之後，會覺得『嘩，原來咁爽㗎』，我哋做三個禮拜㗎嘛，到時應該會識飛㗎喇，好簡單。」另外，在ViuTV劇《I SWIM》中飾演Miss翁和焦Sir的吳海昕、阿卵，今次在舞台劇再次重遇，阿卵亦同樣會追求吳海昕，被取笑痴戀女方的阿卵，更大賣關子，稱故事發生在酒店內，而酒店有泳池和酒店房，劇情的發展令人有無限聯想，他笑謂：「尺度好大㗎，但泳褲之前睇套戲已經見到好多，嗰啲肌肉線條就唔係我負責嘅嘢。」
問吳海昕怕唔怕對住阿卵忍不到笑？她竟衝口而出：「我以為你話日久生情，不過都有呢個可能性嘅，佢咁有才華。」阿卵聞言即表示：「唔使勉強嘅！（你面紅？）有個咁靚嘅女仔讚你實臉紅，我唔臉紅就唔係人啦！」
採訪、攝影：黃曉妍
撰文：娛樂組
