迷人Pink lady丨羅家英窒阿姐「一言堂」爆內褲顏色 汪明荃發火大鬧節目尷尬收尾？

汪明荃與羅家英將於9月1日至10日在西九戲曲中心上演《蝴蝶夫人》，二人今日到電台接受阮兆祥電台節目《一圈圈》訪問，大談粵劇傳承，家英哥同阿姐仲不時鬥嘴，畀大家見到佢哋真實嘅一面。

同場加映： 李玟今日設靈眾星到場致哀 《中年好聲音》戰友安慰李思林

{{hket:ul-video id="8838"}}{{/hket:ul-video}}

家英哥提起命名粵劇團「福陞」時，同阿姐有啲意見分歧，佢表示當時阿姐打算以《千王之王》角色去命名，但佢就嫌太「弱」，阿姐就即時反駁︰「我哋有商有量㗎！」家英哥又回嘴︰「都唔係呀，你知同你講嘢啦！」之後佢就想同主持節目之一阮兆祥「圍爐」︰「你明白㗎啦！你做《福祿壽》咁耐，幾時到你講嘢啫！」阮兆祥就當然唔會捲入鬥爭，表示阿姐係專業同認真，家英哥就話︰「粵劇我都好專業㗎啦！」家英哥又提到劇團成立初時商討演咩劇目時，阿姐都係唱反調，阿姐就否認︰「你諗下！我唔係老闆點會咁多意見！羅家英先係老闆，你吩咐我做咩，我就做咩！但一定要我能力內，我啱啱識咋嘛嗰時！」

{{hket:inline-image name="VCG111410923033.jpg"}}{{/hket:inline-image}}

家英哥表示當年以為同阿姐只會合作一次，冇諗到阿姐竟然對粵劇有興趣，佢搞笑稱當時又冇其他花旦可以同佢拍檔，只好接受阿姐，但多謝阿姐嘅名氣帶挈，令到多咗人睇粵劇。提到護聲，汪阿姐表示常常要講嘢同開會搞到失聲，家英哥就「大逆不道」話︰「你就收下聲啦！」

汪阿姐又講到現時少咗年輕人入行，除積極訓練本地演員，亦從內地輸入人才。他們雖然從小訓練，但嚟到香港都要讀演藝學院4年粵劇課程：「梁兆明就係國家一級演員，佢哋基本功係好嘅，但演繹就好唔同。」家英哥就直言內地演員唔係好識做戲：「要導演教，要自己揸劇本去做，會拿手唔成勢！」佢指香港粵劇的「唱做唸打」同廣州唔同，跟足傳統規格，但內地演員多都唔識；加上劇本係繁體字，對佢哋嚟講睇得好吃力，阿姐續指內地演員文學根底唔深。家英哥感慨粵劇或會失傳︰「無辦法，失就失啦！我都70幾歲啦！我而家仲可以上舞台又打又唱，十場算係咁。」

家英哥同阿姐又喺節目中大玩「夫妻測試」問答，阿姐大爆老公瞓醒第一時間就去洗手間一段時間；而講到最喜歡去邊旅行，佢表示老公喜歡去日本旅行，又指家英哥曾透露過希望到馬來西亞定居。另一條題目就問到阿姐喜歡咩顏色嘅衫，阿姐秒回係紅色，但家英哥就以為係粉紅色，阿姐馬上澄清：「其實我麻麻哋粉紅」，不過家英哥口快快踢爆：「但你啲底褲係粉紅多啲喎！」激嬲阿姐大鬧：「搞錯呀你！」引來全場爆笑，而主持人亦識做提早播歌完結訪問，節目尷尬完場。