黑雨成災丨張曼琳企「瀑布」網民心痛讚專業 港女被消防員救出濕晒唔驚

黑色暴雨警告剛剛除下。暴雨多個小時下，香港多個地方都發生嚴重水浸。唔少打工仔喺冇指引下仍要頂住惡劣天氣返工搵食，亦有唔少工種喺呢個情況下更加要緊守崗位，包括記者同埋提供緊急服務嘅消防員、救護員等。

同場加映：

陳美齡慨嘆香港教育過時要改革 67歲以父親箴言苦盡甘來享兒孫褔

{{hket:ul-video id="9080"}}{{/hket:ul-video}}

香港多間電線台都派出記者去到各區做直擊採訪，其中Now TV記者張曼琳被網民大讚專業。張曼琳喺水浸重災區之一嘅黃大仙站進行拍攝，其中黃大仙中心北館門外嚴重水浸，記者身處位置如瀑布，大量雨水夾雜沙泥沿斜坡沖落商場門口，積水深度超過膝蓋，圍欄亦污水淹沒，大量雜物漂浮。

{{hket:inline-image name="24.png"}}{{/hket:inline-image}}

張曼琳表示自己都唔係好企得穩，一定要扶住側邊欄杆，有市民諗住涉水行入北館最終發覺唔可行要折返。鏡頭原本係影張曼琳上半身，當攝影師拉闊影埋張曼琳周遭環境，效果相當震撼。網民都大讚佢專業淡定，客觀描述環境，但同時都心痛佢要置身險境，留言：「專業，好抵讚」、「其實真係幾危險，但佢都處變不驚」、「攝影師都好抵讚，仲要佢有啲好重啲器材，影得好好」。

幾間電視台都有派出記者採訪，無綫派出咗兩男兩女記者，去到唔同地區直擊；有線都有派出女記者「水中」報道，Now TV除咗張曼琳之外亦有派出另一記者於柴灣通宵守候。唔少網民都記起上星期「蘇拉」颱風過後，去到紅磡報道嘅無綫女記者翟睿敏，事關佢紮行馬抵抗大風同時，身後有幾位市民輕鬆行過，令大家留下印象。亦有網民認為要記者去到危險位置報道唔係必要，雖然令人佩服，但亦不應鼓吹。

另外，消防員都正係盡力搶救各處被困市民，有線電視捕捉到一名少女獲救時欣喜若狂，畫面被瘋傳。報道指當時黃大仙龍翔道水漲得最高時到石壆，消防員逐架車輛檢查有無人被困，救出至少三人，被形容為「英雄救美」。畫面中見到一名港女被消防員抱住救出，得知自己脫險開心到見牙唔見眼，濕晒都冇有怕；另外仲見到兩名男士，相信同佢同行，不過佢身邊四名消防員就完全笑唔出，辛苦晒！

撰文︰娛樂組

圖片來源：截圖