恭喜發財! 龍年行大運!周吉佩、羅啟豪、李佳和支嚳儀幾位《中年好聲音》歌手，迎接龍年的來臨，大家都滿腹大計，期待這一年大展拳腳，各自在音樂上都會有好的發展。
率先有自己的Solo歌曲的周吉佩，希望在龍年仍然可以再造更多歌之外，還有目標在年尾可以舉行個人音樂會。而羅啟豪、支嚳儀則分別已錄製完成獨立歌曲，排隊推出。李佳朝著造首支歌曲、做演唱會的方向進發。周吉佩還表示，自己最希望可以有團歌，他說：「覺得大家由呢個比賽出嚟，除咗想大家各自有歌、實現夢想開演唱會之外，我仲有多一個夢想，貪心啲想有一首屬於我哋《中年好聲音》一班人嘅歌，要做一首全新嘅歌。」
大家聽到周吉佩的計劃十分雀躍贊成，你一言我一語提出想法，由於之前大家已經唱過一首輕快節奏歌曲，所以他們覺得可以計劃創作一首舒情慢歌，周吉佩指，這歌可鼓勵一班同樣跟自己一樣追求夢想的人。支嚳儀提意每人交出一句歌詞，由自己負責唱出，羅啟豪笑謂可以負責寫Rap的部分，李佳就提意可以多添一些R&B的感覺。
自從參加《中年好聲音》之後，周吉佩、羅啟豪、李佳和支嚳儀人氣急升，在龍年大年初一已經要開工，羅啟豪於初二更要到內地做商演。大家都豐衣足食開個好年。而且由去年初入行，大家已經跟圈中習俗，年紀和輩份都尚輕，亦已經派開工利是，羅啟豪表示：「其實每年都冇乜準備，雖然我未結婚，但有啲人都會派畀佢哋。」支嚳儀提意羅啟豪舉行粉絲聚會，自己可以負責幫手收粉絲們的利是。
周吉佩工作量多，今年都出手都闊綽了，他笑謂打算今年派利是加碼3倍：「初入行我未結婚，覺得派利是畀人好似身份幾尷尬，但而家就覺得新年派利是會好開心。好多人平時唔見，喺新年見面會特別熱情。我今年打算加大手筆，因為派利是都係一個祝福，大家開心。只要到大家見到我嗌聲：『周生』我都OK。」
回想以前的農曆年，大家都有不少難忘回憶，周吉佩笑謂以往會跟隨家人回鄉探親，鄉下各家各戶的親戚齊集，每家人各自己整一些新年菜式，然後眾人齊集一起吃飯，充滿熱鬧節日氣氛：「屋企好多親戚，有好多輩份都唔記得，有次個長輩同我傾偈，因為佢喺家中排第八，猛咁叫我嗌佢八婆，我好尷尬都唔知點算好。」自從祖父母離世，周吉佩已少了回鄉下，他表示要延續跟家人的連繫，之後會多帶兒女回鄉探親。
李佳就試過在大佳節被長輩「開年」，上了人生難忘的一課：「每年媽媽會幫我準備新衫，點知有次同朋友出去玩，有其他小朋友放煙花，啲花火彈喺我件衫，燒咗好大個窿。之後個朋友帶我去追討要佢哋賠償我件衫，最後拎咗二百元。返到屋企畀姨媽鬧我，要我去番人哋屋企還錢同講對唔住，當時我覺得好委屈，但大咗就知當時自己唔懂事，而家我覺得家人教我的品德，長大後學到嘢。」
支嚳儀就有一年試過要策劃自己的烘培生意，整個新年和丈夫在家埋頭苦幹。而細個回上海探親，見到任婦科醫生的外婆仍然沒空，不斷接病人電話解決問題，支嚳儀當時甚感奇怪：「食緊飯嘅時候，外婆不斷要聽電話，我忍唔住搶咗電話同對方阿姨講，外婆同我哋食緊團年飯，初四先打電話嚟，嗰晚呢個動作我做咗十幾次。」當支嚳儀長大入社會工作，才明白外婆十分敬業，這行為影響自己好深遠。
眾人之中，羅啟豪因為好細個就去外地讀書，甚少感染農曆年的熱鬧氣氛，就算回港生活後，碰上了疫情都未能跟親戚拜年，所以對於新年的記憶甚少：「最記得都係細個不斷食全盒入面嘅糖，大咗去外國讀書，就會同屋企人電話拜年，佢哋會幫我儲起親戚派嘅利是。」
撰文：王連連
攝影：何家賢
鳴謝：屏山鄉坑尾村青年團
立刻加入《晴報》WhatsApp頻道，獲取最新娛樂、健康及著數資訊，仲有送禮活動！
U Lifestyle App睇盡《晴報》新聞資訊及自家節目 ↓
↓↓同步更新、更快更順↓↓
【免費下載】