Pokémon GO熱爆網絡 登Google及fb年度榜

2016年嚟到尾聲，係時候要回顧一下今年Google同Facebook（fb）嘅熱門議題同打卡地點，大家又估唔估到有咩穩坐兩個社交媒體嘅熱爆話題呢？登登登登！就係風靡全球嘅手機遊戲「Pokémon GO」，成為本年度最熱爆嘅Google搜尋關鍵字，Google香港2016熱爆關鍵字手機搜尋排行榜嘅第四位，同時亦係2016年Facebook全球最熱門議題季軍，認真巴閉！

有關「Pokémon GO」嘅搜尋亦成為香港熱搜項目，當中最多人問：「how to play Pokémon go」，另外「Pokémon GO」精靈名由英文譯番中文係乜東東，亦係港人愛問嘅Pokemon問題。

講到港人最愛打卡熱點，你估唔估到係邊度呢？正所謂「未出發先興奮」，原來2016年Instagram熱門打卡地點榜首，就係香港國際機場，第二至第五位依次係香港迪士尼樂園、維多利亞港、山頂同銅鑼灣。

fb大中華區董事總經理Jayne Leung話，依家係流動電話嘅年代，香港成為全球其中一個最流動城市，所以今年至出年都會着重手機方面發展。佢仲話fb嚟梗會係安全中心推出「家長專區」，透過整理好基本資訊同秘訣，家長會更了解fb嘅運作，融入囝囡網上社交生活！