新加坡style「撈起」

外遊回港，手信通常佔行季一部分，最近有位朋友話，淨係禮物都帶咗35kilo，黛安嚇咗一跳。話說，上星期同新加坡旅遊局大中華區首席代表兼署長劉詩萍（See Peng）同中國華南地區、香港及澳門區處長黃慶祥（Etienne）食飯，Etienne準備咗禮物，就係特登去書局揀咗一人一本書，旅遊書、歷史書、食譜等。一本書都唔輕，一個人「抬」咁多本書返香港，呢份心意真係不得了！

除咗禮物，See Peng喺餐單加咗「發財撈起」，話要同大家應下節，仲話：「農曆新年喺新加坡幾乎日日都食『撈起』。」原本黛安以為，食撈起係用筷子將各種材料撈埋就得，Etienne話咁樣「太斯文」，「一邊講祝賀說話，一邊『撈』要豪邁啲，撈到飛晒出界先夠氣氛㗎。」佢仲話，自撈起喺當地興起後，大家每次食一定要撈得愈高愈好，通常枱面一定會有食物飛出嚟咁話。

邊食邊講，黛安就記起，舊年係新加坡國慶50周年，旅遊局有好多活動，Etienne話今年都唔會鬆懈，例如下個月月底開始，旅遊局會有一系列針對年輕人嘅推廣，好似facebook專頁將會播出「請一日假新加坡」短片，除咗介紹當地旅遊景點之外，仲會帶大家睇下當地人平時有咩好去處！