《迷你兵團》發達秘笈

最近全城都為三隻黃色迷你兵着迷，連麥記的開心樂園餐玩具都被搶購一空。這班古靈精怪的迷你兵團來自動畫《壞蛋獎門人》，由於實在「巧打耳」，結果「水鬼升城隍」坐正做埋主角。

《迷你兵團》可說是個前傳，簡單交代成班豆丁從何而來，為了跟衰波士而闖入英國找「事頭婆」踢竇，充滿密集式笑料，令人噴飯，開心過睇賀歲片。「迷你兵」唔識講人話，全部嘰哩咕嚕，指手劃腳，偶爾夾雜Hello、Banana嘅音，失驚無神又會出現多國語言單字，例如「些些」（普通話謝謝），完全不受文化地域所限，反而全球爆紅，大人細路「一見你就笑」。

不過，即使影片全球賣座也不是唯一致勝之道，現時搞電影，單靠票房歸本未夠穩陣，今次三隻主角的周邊商品賣過滿堂紅，仲要成為搶手貨，環球影業今年繼《侏羅紀世界》後又中Jackpot。雖知道迪士尼、彼思、夢工場一向是動畫界的老大哥，二十世紀褔斯有《冰河世紀》站穩住腳，環球終靠呢班「迷你兵」發圍成功。