亞洲青年電影節 同新晉導演交流

睇電影有時真係領悟到一啲人生哲理，青年廣場最近搞咗個《CULTURE@MAZE亞洲青年電影節》，由今個月到明年元旦，精選咗13部來自亞洲唔同地區嘅電影喺廣場內放映，包括港產片《點五步》、《幸運是我》等。青年廣場早幾日仲特登搞咗個啟動禮，請咗《點五步》嘅年輕新晉導演陳志發分享感受，佢話而家係一個「講故事」年代，如果對電影工作有興趣，就要多接觸唔同嘅媒體擴闊視野，仲贈咗四字真言畀有志從事電影工作嘅年輕人，就係「堅持、努力」。

電影節仲有好多活動，例如電影人對談、走訪電影取景場地等，都好豐富㗎，詳情可以去電影節網站（www.youthsquare.hk/chi/hot-news/203/）睇下。

除咗搞電影節，青年下個月9至11號會舉辦「Garden of the Artisans藝術節」，喺Y旅舍12至14樓展出世界各地青年藝術家作品，同埋8位本地青年藝術家設計嘅趣味主題房間，如70、80年代舊式茶餐廳、貓星人襲地球等。