國泰聖誕機票大賣 有雙位數增長

「嘩，你哋生意真係好好喎，啲機票咁搶手嘅？」昨日同國泰航空營業及市務董事Dane（程鼎一）食lunch，黛安同佢哋講起趁聖誕假想去成都睇下一帶一路嘅發展機遇，順便參觀下成都太古里，其實我連酒店都差唔多訂埋，誰不知就係買唔到時間靚嘅機票。

聽阿Dane講先知，原來今個聖誕假國泰嘅機票賣得好好，有雙位數增長，估計受惠港元匯價強，吸引市民外遊意欲。國泰生意咁好，黛安即刻恭喜佢哋，順便八卦問下邊度機票最好賣。聽佢講最受歡迎目的地依次係日本、台灣、韓國同泰國，都係一啲鄰近嘅旅遊熱點。阿Dane話唔少人上星期已經出發，仲溫馨提示黛安，如果揸車去機場，記得預先check定有無泊位，免得要揸架車返轉頭，而返港最高峰日係1月2號。