譚強豬

譚強乃本地豬中之強，識養、識talk，很多時誤以為他養豬的技巧源自talk得！

與譚強共桌飯敘，無限笑語，不用三杯到肚已然natural high，從他的organic豬場，談到養豬奇技、各式豬肉、如何煮食‥‥‥氣氛熱烈。

這夜在富嘉閣，唯靈叔叔設計「老魚嫩豬」菜單，由名廚基哥主理掌廚，譚強提供養了五年的巨大生魚，30日未戒奶、從未碰過食糧、如假包換的乳豬（阿彌陀佛）。

取名「家肥屋潤」，原隻蒸乳豬為首度兼首席的菜式，溫馨軟滑，齒頰留香，連骨都食晒，果然譚強豬，極品之致！

另一道大家追着吃的譚強豬食「好巿發財」，材料包括髮菜、蠔豉、膶腸、馬蹄、香芹。膶腸乃譚強出品，寄賣於富嘉閣，入冬時已獲賜，歎過，送紅酒至佳。這次基哥煮法，大眾追着吃這季節供應快完的膶腸，大呼美味！

名額24人，初七人日舉行，食家媒體唯靈一家、梁家權、馬美慶、Q仔、「留家」劉健威＋劉晉父子、肉商伍智聰，加牛三館拍檔牛肉專家Frankie、廚藝名媛作家馬廖千睿‥‥‥基哥、譚強及二位公子等，頗具舊時大宅門的年飯，有老有嫩，有男有女，有酒有肉，名副其實老魚嫩豬，乜都有，慶豐年！

（本欄逢周三至五刊登）