《賭城風雲II》 有賭未為輸

今年有十部賀歲片，港產片與動畫片各佔四部，如果你問最值得睇是哪一部？識揀，一定揀《STAND BY ME：多啦A夢》粵語版，電影本身笑中有淚，叮噹與大雄，充滿港人集體回憶。

四部港產片有驚有喜，有靚人靚景，但劇情搵氣頂。有群星拱照，但似YouTube短片一條接一條。而有人形容王晶執導，令人卻步，但《賭城風雲II》出來的效果最穩陣，有爆破、有特技、有動作，仲有發哥和賭術，完全齊備港產片煞食元素，亦是今年最夠氣氛的賀歲片，本地票房從後趕上，首周超越1900萬港元，成為目前賀歲檔最收得港產片。

《衝上雲霄》靠情人節優先場率先彈出，可惜似三個超級MV，近日票房像是遇上強勁氣流，高空急墜。至於吳君如亦再出奇謀，即日推出《12金鴨》加長版，加入彭于晏這位新鴨登場，雖有吸引力，但網民反應兩極，相信彭于晏戲份不及「鵬于晏」多，觀眾亦未必睇多次。

還有，真的要佩服黃百鳴的勇氣，《浮華宴》不可說是爛片，有思考哲理，但並非賀歲格局，觀眾散場時感到無所適從，情況就如你想飲普洱，卻給了Earl Grey，黃生應考慮如何吸引鍾意飲西茶的客源。