新華六千萬買商廈 兩年升值七成

新華旅遊總辦公室上周喬遷，黛安亦有到賀。以往新華一直租用觀塘創紀之城六期的單位做office，有見租金不斷升，新華董事總經理楊章桂芝前年索性斥資6,000萬元，買入旁邊的新商廈的萬二呎單位自用，聽講物業至今已升值近七成至一億元，真是投資有道。

日前的開幕酒會有數百位嘉賓出席，多間航空公司、酒店都派員到賀。楊太還請了旅遊業議會主席胡兆英、立法會旅遊界議員姚思榮及識玩識食的李純恩做剪綵嘉賓。

來賓眾多，然而花牌數目寥寥可數，黛安深感奇怪。原來楊太為了支持公益，一早呼籲大家省卻花牌的錢捐公益金，結果有逾80家公司響應，為公益金籌到八萬元善款，認真樂善好施。

參加「知己遊」學叻哥

最近，新華冠名贊助的旅遊節目《叻哥遊世界》，外界有不俗回響，楊太話見到觀眾反應咁好，自己亦好開心；同時有唔少人同佢講好羨慕「叻哥」陳百祥，有美人相伴賞美景。不過，楊太就叫大家唔使眼紅，想學叻哥坐獨木舟探索亞馬遜雨林、體驗徒手捉鱷魚，參加新華的小型組團項目「知己遊」一樣可以。只要湊夠兩個人，就可組團成行，幾時出發自己決定，繁瑣的食、玩、住行程則由專人包辦。

除咗高檔團，公司在復活節後會推出團費2,013元起的韓國、泰國、台灣等地的優惠團，價錢已包景點入場費、旅遊保險、導遊費等，又保證乘坐國泰或港龍航班，相當抵玩。咁多發展，新華營運部助理總經理蘇子楊都話今年要請多10％領隊先至夠。