昂坪360料兩周內重開 10歲童免費乘搭 另推主題纜車

連接東涌同昂坪高原嘅昂坪360，係唔少旅客遊港必坐之選。之前纜車為咗換纜索停咗一排，黛安帶外國朋友來港玩都少咗一個景點。但黛安收到風，昂坪360換纜索工程已大致完成，測埋重量及營運系統，有望喺未來兩周內重開啦﹗

推出電子排隊服務

昂坪360最近仲請到10個香港著名設計師，包括靳埭強、劉小強等設計咗廿款以「香港的驕傲—大嶼山」為題嘅纜車，有青馬大橋、大澳龍舟，夠晒本土特色。公關姐妹話嚟緊會推限時優惠賀賀佢，只要喺昂坪市集買滿200蚊嘢，仲可憑單換港鐵單程車票一張。

昂坪360董事總經理關敏怡話，適逢開業十周年，所有10歲小朋友都可以喺重開後至今年12月31日無限次免費搭標準車廂，最多同行2名大人都有9折，「確實幾時重開主要睇天氣，因天氣會影響到測試情況。」她又透露今次維修喺預算$8,000萬內完成，暫無加價打算，預計重開後每日可接待5,200人次。首星期營業時間縮短少少，只開朝10晚5，以便進行夜間檢查及維護；一周後才回復朝10晚6。

纜車重開首日，會推出電子排隊試驗版新服務，旅客用fb Messenger或WeChat就可拎到排隊籌，有埋預計輪候時間，夠晒方便。