科學園創科嘉年華 學整太陽能模型車

科技日新月異，如果想唔Out兼要長知識，真係要keep住留意多啲新科技新聞。黛安知道創新科技署即將喺10月21日（星期六）至29日（星期日）一連9日，於香港科學園舉辦以「生活智慧‧盡在創新」為主題嘅「創新科技嘉年華2017」。職業訓練局（VTC）公關姊妹就報料話，佢哋會參與並展出多項來自機構成員、好似香港專業教育學院（IVE）等學院嘅師生，共同研發嘅作品及研究項目。

話明係嘉年華，黛安就最想知道，有咩可以親身參與、玩埋一份先？公關姊妹就舉例話，參觀者來到VTC嘅展台，可以嘗試佩戴先進嘅HoloLens，喺互動嘅模擬醫療場景下，使用自動體外心臟除顫器（AED），體驗拯救突發性心臟驟停患者嘅驚險情況；又或者喺IVE工程學科師生指導下，製作獨一無二嘅太陽能模型車！就咁聽落都已經好有趣啊，大家都千祈唔好錯過啦！