有性格食肆

有些食肆做到街知巷聞，其門如市，不因價廉物美，而是靠招呼差、樓面惡，動輒粗聲喝罵食客，完全是我不希罕你光顧，你受得氣方好送上門來的霸氣。

不用細數啦，不就是那間老式茶樓、那間茶餐廳、那間粥麵舖……對了，近年有門口貼正趕客告示，叫客人「貪平勿進」、「唔等得，唔好食」、「扮食家請去真嘅米芝蓮」的後進。

奇就奇在，這居然真的可以成為吸客的大賣點，這些食店似乎都做得不賴。大概市民的邏輯正是︰夠膽斥喝食客，肯定對出品信心爆棚，照計難食極有限。

唔，你要這樣假設，姚鈴都拿你沒法，去吧去吧，你不介意吃完一肚氣，你不介意貼錢買難受，悉隨尊便，祝你好運。

又或者這樣，有些人就是好勝，專向高難度挑戰。你趕客，我偏要來。你罵人，我偏要待你特別好。總之，食到你當我自己人，看你還鬧不鬧。

那些出名惡死的老店，又真的待熟客特別親，被罵的一般都是不識死的walk-in客人。

花墟雀仔街附近有家茶餐廳，你真係唔好見位就坐，繁忙時間你兩位不共坐卡位一邊，生客見空枱一張就坐埋去，十之八九被鬧爆。但人家長做長旺，你唔恨得咁多。

（本欄逢周二、四刊登）